ތިމާގެ ދަށުން ވަޒީފާ އަދާކުރާ ފަރާތްތަކަށް الله މަތިން ހަނދުމަކޮށް ނަމާދު ކުރުން މަނާ ކުރާ ވެރިން އެ އެކުރަނީ ވަރަށް ނުބައިވެގެންވާ ކަމެއް ކަމަށާ އެމީހަކަށް ދެދުނިޔޭގައި އެކަމުގެ އަޒާބު ލިބޭނެ ކަމަށް ދީނީ ޢިލްމުވެރިޔާ އައްޝެއިޚް އަބްދުއްސަލާމް ދާވޫދު ވިދާޅުވެއްޖެއެވެ.

ދާރިސް ޓީވީން ގެނެސްދޭ ޢިލްމީ ޚަޒާނާ ޕްރޮގްރާމްގައި، ވަޒީފާ އަދާކުރާ ބައެއް ތަންތަނުގައި ނަމާދު ކުރެވޭނެ ފަދައެއް ނެތުމާއި، ބައެއް ތަންތަނުގެ ވެރިންގެ ފަރާތުންވެސް ނަމާދު ކުރުމަށް ހުރަސް އަޅާ ކަން ފާހަގަކޮށް ކުރެވުނު ސުވާލަށް ޖަވާބު ދެއްވަމުން، ޝެއިޚް އަބްދުއްސަލާމް ވިދާޅުވީ، ނަމާދު ޤާއިމް ކުރުމަކީ އެންމެ މަތިވެރި އެންމެ މުހިންމު އަޅުކަން ކަމަށެވެ.

އަދި ވަޒީފާ އަދާކުރާ ތަނަކަށްވެސް އެންމެ ރަނގަޅުވާނީ އެތަނުގެ މުވައްޒަފުންނަކީ މާތް الله އާއި އޮތް ގުޅުން ރަނގަޅު ކޮށއފައިވާ އަޅުން ކަމުގައި ވާނަމަ، އެ މީހުންގެ ވަޒީފާއަށްވެސް ފަރުވާތެރިވެ އަމާނާތްތެރިވާނެ ކަމަށެވެ.   

މިއާއެކު ޝެއިޚް ވިދާޅުވީ، ތަންތަނުގެ ވެރިންގެ ގޮތުގައި ތިބޭ މީހުންވެސް، އޭނާގެ ދަށުގައި މަސައްކަތްކުރާ މީހުންނަށް ކޮށްދޭންޖެހޭ އެންމެ މުހިންމު ކަމަކީ އެމީހުން އެމީހުންގެ ވެރި ރައްބަށް އަޅުކަން އަދާކުރުމަށް ފުރުސަތު ދިނުން ކަމަށެވެ. 

މިއާއެކު ޝެއިޚް ވަނީ، ނަމާދު ކުރާނެ ގޮތް ފަހިކޮށް ދިނުމަކީ ވަޒީފާ ދޭ މީހާގެ ވާޖިބެއް ކަމަށާ އެކަން ނުކޮށއދޭ ނަމަ، ވަޒީފާ އަދާކުރާ ފަރާތްތައް ކޮންމެ ގޮތަކުން ނަމަވެސް ނަމާދު އަދާކުރަންވާނެ ކަމަށެވެ.