ޙައްޤަކާ ނުލައި، ފިރިމީހާގެ ގާތުން ވަރިވާން އެދޭ އަންހެނާގެ މައްޗަށް ސުވަރުގޭގެ ވަސް ޙަރާމް ކަން ރަސޫލާ ސޢވގެ ހަދީޘްފުޅުން އެނގޭ ކަމަށް މިއަދުގެ ޚުތުބާގައި ބުނެފިއެވެ.
ވަރިކުރުމާއި ޢިއްދައާއި ބެހޭ ހުކުމް ތަކުގެ މައްޗަށް އަލިއަޅުވާލައި މިއަދު އިއްވި ޚުތުބާގައި ފާހަގަކުރެއްވި ގޮތުގައި، އިސްލާމީ ޝަރީޢަތުގައި ވަރިއަކީ ވަރަށް ގިނަ ފިޤްހީ ޙުކުމްތަކެއް ހިމެނޭ ކަމެކެވެ. އަދި ކައިވެންޏާއި ވަރިއަކީ ސަމާސާކުރެވޭނެ ކަންކަމެއް ނޫން ކަމަށެވެ.
ރަސޫލާ ޞޢވ ހަދީޘް ކުރެއްވިއެވެ: "ތިން ބަހެއް ގަސްތަކާލައިގެން ނުވަތަ ސަމާސާއަކަށް ބުނިކަމުގައި ވިޔަސް އެ ކަންކަމުގެ ޙުކުމް ހިނގާނެއެވެ. އެއީ ކައިވެނިކުރުމާއި، ވަރިކުރުމާއި ކައިވެނި ރުޖޫޢަކުރުމެވެ"
އަދި ހަމައެހެންމެ، ޝަރުޢީ ސަބަބަކާ ނުލައި އަނބިމީހާ ފިރިމީހާގެ ކިބައިން ވަރިވުމަށް އެދުމަކީ އިސްލާމްދީނުގައި ނަހީކުރައްވާފައިވާ ކަމެއްކަން ފާހަގަކުރެއްވިއެވެ. މިކަމާ ގުޅޭގޮތުން ރަސޫލުސޢވ ގެ ޙަދީޘްފުޅެއްވެސް ވަނީ ހިމަނާފައެެވެ.
"(أَيـُّمَا امْرَأَةٍ سَأَلَتْ زَوْجَهَا طَـلَاقًا مِنْ غَيْرِ بَأْسٍ فَحَرَامٌ عَلَيْهَا رَائِحَةُ الْـجَنَّةِ). މާނައީ: ޙައްޤަކާ ނުލައި، ފިރިމީހާގެ ގާތުން ވަރިވާން އެދޭ އަންހެނާގެ މައްޗަށް ސުވަރުގޭގެ ވަސް ޙަރާމްވެގެންވެއެވެ"
ޚުތުބާގައި އިތުރަށް ބަޔާންކުރެއްވި ގޮތުގައި ކައިވެންޏަކީ މަތިވެރި ގުޅުމެކެވެ. މިކަން ސާބިތުކޮށްދެއްވުމަށް ޤުރުއާނުގެ އާޔަތެއް ނަންގަވައި، އަނބިންނަކީ ފިރިންނަށް ހަމަޖެހުން ލިބިދޭ ބައެއްކަމާއި، އަދި الله ތަޢާލާ ދެމަފިރިންގެ މެދުގައި ލޯތްބާއި އޯގާތެރިކަން ލައްވާފައިވާކަން ފާހަގަކުރެއްވިއެވެ.
އަދި ދެމަފިރިއެއްގެ ދެމެދުގައި އުފެދޭ އަރައިރުން، ވަރިއާ ހަމައަށް ދިއުމުގެ ކުރީން، އެ އަރައިރުން ޙައްލުކުރެވޭނެ ގޮތެއް އޮތްތޯ ބެލުމަށް ޓަކައި، ދެ ފަރާތުން ފޮނުވާ ނިޔާވެރީންގެ ނިންމުމާ، އެއް ގޮތަށް ޢަމަލުކުރަންޖެހޭ ކަމަށްވެސް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
