ތޫނު އެއްޗެއް ބޭނުންކޮށްގެން މީހަކަށް ބިރުދެއްކިކަމަށް ތުހުމަތު ކުރެވޭ މީހަކު ބަންދު ކުރުމަށް ކްރިމިނަލް ކޯޓަށް ގެންދިޔުމުން އެކަން ކުރެވުނީ ބަނޑުހައިވެގެން ކަމަށް ބުނެފިއެވެ.
މި މައްސަލައިގައި ހައްޔަރުކޮށްފައިވަނީ 34 އަހަރުގެ ގދ. ރަތަފަންދޫއަށް ނިސްބަތްވާ ދިވެހި ފިރިހެނެކެވެ.
އޭނާގެ ބަންދު އަމުރުގައި ބުނެފައިވާ ގޮތުން އޭނާ އެ ކުށް ކުރިކަމަށް ތުހުމަތު ކުރެވޭ ކޮންމެވެސް މިންވަރަށް ހެކި ހުށަހެޅިފައިވެއެވެ. އެގޮތުން ސީނަށް ދިޔަ ފުލުހުންގެ ޙާދިސާ ރިޕޯޓު ހުށަހެޅިފައިވާކަން ފާހަގަކޮށްފައިވެއެވެ.
ބަންދު އަމުރުގައި އިތުރަށް ބުނީ އޭނާ ހައްޔަރުކޮށްފައިވަނީ ޖިނާއީ އިޖުރާއަތުގެ ޤާނޫނާ އެއްގޮތަށްކަަމަށެވެ.
މި މައްސަލައިގައި ހައްޔަރުކުރި މީހާ އޭނާގެ މައްޗަށް ކުރެވޭ ތުހުމަތަށް އިންކާރުކޮށް، އެކަން އޭނާއަށް ކުރެވުނީ ބަނޑުހައިވެފައި ހުރުމުން ކަމަށް ކޯޓު އަމުރުގައި ބުނެފައިވެއެވެ.
އެހެންކަމުން މުޖުތަމައުގެ ސަލާމަތާއި ރައްކާތެރިކަމަށް ބަލައި އޭނާ 15 ދުވަހަށް ބަންދު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.
އޭނާގެ ބަންދުގެ މުއްދަތު ހަމަވާނީ 25 ނޮވެމްބަރު 2024 ގައެވެ.
Advertisement
This content is created and paid for by advertisers and does not involve Voice Journalists
