ބަންގްލަދޭޝްގެ ގައުމީ ޓީމާއެކު އެކުވެރިކަމުގެ މެޗުތަކެއް ކުޅެން ރާއްޖޭގެ ގައުމީ ފުޓްބޯޅަ ޓީމު އިއްޔެ ހަވީރު ބަންގްލަދޭޝްއަށް ފުރައިފި އެވެ.

މިދަތުރުގައި ބަންގްލަދޭޝްގެ ގައުމީ ޓީމާ ދެކޮޅަށް ރާއްޖޭ އިން ދެ މެޗު ކުޅުމަށް ހަމަޖެހިފައިވާއިރު ފުރަތަމަ މެޗު މިހަފްތާގެ ބުދަ ދުވަހު ކުޅޭއިރު، ދެވަނަ މެޗު ކުޅުމަށް ހަމަޖެހިފައިވަނީ އަންނަ ހަފްތާގެ ހޮނިހިރު ދުވަހުއެވެ.

ފީފާ ރޭންކިންގައި ރާއްޖެ މިވަގުތު އޮތީ 163 ވަނައިގަ އެވެ. އަދި ބަންގްލަދޭޝް އޮތީ 185 ވަނައިގައެވެ. ނަމަވެސް އެންމެ ފަހުން މިދެޓީމު ކުޅުނު ތިން މެޗުން ވެސް ރާއްޖެއަށް މޮޅެއް ހޯދިފައި ނުވާއިރު، ދެ މެޗުން ބަންގްލަދޭޝް މޮޅުވިއިރު އަނެއް މެޗު ނިމިފައިވަނީ އެއްވަރުވެގެންނެވެ.

އަހަރަކަށްފަހު ގައުމީ ޓީމުން ކުޅޭ ފުރަތަމަ މެޗުގައި ހެޑް ކޯޗަށް އަލީ ސުޒޭން ހަމަޖައްސާފައިވާއިރު، އެސިސްޓެންޓް ކޯޗަކީ އަހުމަދު ޝާކިރު (ޝަކިއްޓޭ) އެވެ އަދި ގޯލްކީޕަރު ޓްރެއިނަރު ހަސަން ހަމީދު (ޑަކޭ) އެވެ. އަދި މިމެޗަށް ކޯޗު ސުޒޭން އެކުލަވާލި ސްކޮޑުގައި  ޒުވާން ގިނަ ކުޅުންތެރިންތަކަކަށް ފުރުސަތު ދީފަ އެވެ.

އެގޮތުން 20 އަހަރުން ދަށުގެ ގައުމީ ޓީމުގައި ހިމެނޭ މުޒްދާން ހަސަން އާއި އަބްދުﷲ ލޫތު އިބްރާހީމް އަދި ގޯލްކީޕަރު މުހައްމަދު ޔާމީންގެ އިތުރުން ޓީސީ ސްޕޯޓްްސް ކްލަބުގެ މިޑްފީލްޑަރު ހައިސަމް ރަޝީދާއި އަހުމަދު މާއިޝް ރަޝީދަށް ވެސް ވަނީ މިފަހަރުގެ ސްކޮޑުން ފުރުސަތު ލިބިފައެވެ.

ރާއްޖޭގެ ގައުމީ ޓީމު އެންމެ ފަހުން މެޗެއް ކުޅެފައި ވަނީ މިދިޔަ އަހަރުގެ އޮކްޓޫބަރު މަހު އޮތް ވޯލްޑް ކަޕް ކޮލިފައިންގައި ބަންގްލަދޭޝްއާ ދެކޮޅަށެވެ. އަދި ޕްލޭއޮފްގައި ބަންގްލަދޭޝް އަތުން ބަލިވި ފަހުން ސީނިއާ ޓީމު އިތުރު މެޗެއް ކުޅެފައެއް ނުވެއެވެ.

މީގެ އިތުރުން 2023 ވަނަ އަހަރުގެ ޑިސެމްބަރު މަހު ދިވެހި ޕްރިމިއާ ލީގު ނިންމާލި ފަހުން ދިވެހި ފުޓްބޯޅަ މިވަގުތު އޮތީ ކޯމާއެއްގައެވެ. އަދި އައު ސީޒަން ފެށޭނެ ދުވަހެއް ނޭގެއެވެ. ނަމަވެސް ގައުމީ ޓީމުގައި ހިމެނޭ 14 ކުޅުންތެރިން ކުޅޭ މާޒިޔާ ސްޕޯޓްސް ކްލަބް ވަނީ މިދިޔަ މަހު އޮތް އޭއެފްސީ ކޮންފަރެންސް ލީގުގައި ވާދަ ކޮށްފަ އެވެ.