ދެކުނު ޗައިނާ ކަނޑުގެ ސަރަހައްދާއި، ޕެސިފިކް ސަރަހައްދުގައި ޗައިނާގެ އަތްގަދަކުރުން އިތުރުވެފައިވާ ދަނޑިވަޅެއްގައި، އޮސްޓްރޭލިއާ އާއި އިންޑޮނީޝިއާއިން ގުޅިގެން އަސްކަރީ ތަމްރީންތަކެއް ހަދައިފިއެވެ.

އަސްކަރީ ގުޅުން ބަދަހިކުރުމާއި ގުޅޭގޮތުން ދެގައުމުގެ މެދުގައި އެކުލަވާލެވުނު އެއްބަސްވުމަކަށްފަހު ބޭއްވި މި ތަމްރީނުތަކުގައި ދެ ހާހަށްވުރެ ގިނަ ސިފައިން ބައިވެރިވިއެވެ. އިންޑޮނީޝިއާގެ ޖާވާގައި 4 ދުވަހުގެ މުއްދަތަކަށް ކުރިއަށްދިޔަ މި ތަމްރީންތަކުގައި ކަނޑާއި، އެއްގަމާއި، ވައިގެ އިތުރުން ސައިބަރ ސްޕޭސްއާއި ގުޅިހުރި އަސްކަރީ ތަމްރީނުތައް ހަދާފައިވެއެވެ. އަސްލު ވަޒަން ބޭނުންކޮށްގެން، ހަނގުރާމައާއި ކުރިމަތިލުންތަކުގެ އެކި ސިނާރިއޯތަކަށް ހެދި ތަމްރީންތަކުގައި ގިނަ އަދަދެއްގެ ޓޭންކަރުތަކާއި މަނަވަރުތަކާއި ލޭންޑިންގް ކްރާފްޓްތަކުގެ އިތުރުން އަސްކަރީ ޖެޓް ބޭނުންކޮށްފައިވެއެވެ.

ދެގައުމު ގުޅިގެން އަސްކަރީ ތަމްރީންތަކާއި އެހެނިހެން އަސްކަރީ ކަންކަމުގައި އެއްބާރުލުން އިތުރުކުރިއިރު، އޮސްޓްރޭލިއާއާއި އިންޑޮނީޝިއާއިން މިހާތަނަށް ޕެސިފިކް އަދި ދެކުނު ޗައިނާ ކަނޑުގެ މައްސަލައިގައި ގެންގުޅުނީ ތަފާތު ވިސްނުންތަކެކެވެ. ޗައިނާއާއި ދެކޮޅަށް އޮސްޓްރޭލިއާއިން ފާޅުގައި ނިކުމެ އޮތް އިރު، އެގައުމުން ވާގި ހޯދަމުން އަންނަނީ އެމެރިކާއާއި ހުޅަނގުގެ ބާރުތަކުގެ ކިބައިންނެވެ. އަނެއްކޮޅުން އިންޑޮނީޝިއާއިން މިމައްސަލައިގައި މީގެ ކުރިން ބެލީ ވީހާވެސް ވަކިކޮޅަކަށް ނުޖެހި އޮވެވޭތޯއެވެ. އެހެން ނަމަވެސް ދެކުނު ޗައިނާގެ މަސްރަހު ހޫނުވެ، ކުރިމަތިލުންތަކުގެ ބިރު ބޮޑުވަމުންދާއިރު، އަދި ޗައިނާއިން އެސަރަހައްދަށް އަތް ގަދަކުރަމުންދާއިރު، ބާރު ގަދަ އެހެން ގައުމުތަކާއި ގުޅުން ބަދަހިކުރުން ނޫން ގޮތެއް އިންޑޮނީޝިއާއަށްވެސް މިހާރު ނެތެވެ.

Advertisement