ޓުއަރިޒަމް ވިޔަފާރިތަކަށް ލިބޭ ބޭރު ފައިސާއިން ބައެއް ބޭންކަށް މާރުކުރަން މަޖުބޫރުވާ ގޮތަށް އޮތް ގަވާއިދަށް ތާއީދު ނުކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެމްއެމްއޭއިން ނެރެފައިވާ ގަވާއިދުގައި ވަނީ، ރިސޯޓުތަކާއި އިންޓަގްރޭޓެޑް ރިސޯޓާއި ފަތުރުވެރިކަމުގެ އުޅަނދުފަހަރާއި ރިސޯޓު ހޮޓަލާއި ސިޓީ ހޮޓާ ފަދަ ތަންތަނުން އެ ތަންތަނަށް އަންނަ ކޮންމެ ފަތުރުވެރިއެއްގެ ބޮލަަކަށް 500 ޑޮލަރު މާރުކުރަންޖެހޭނެ ކަމަށެވެ.

އަދި 50 އެނދަށްވުރެ މަދު އެނދު ހުންނަ ގެސްޓުހައުސްތަކުން ޓޫރިސްޓެއްގެ ބޮލަކަށް 25 ޑޮލަރު މާރުކުރަންޖެހޭނެ ކަމަށެވެ. މި ފައިސާ މާރުކުރަންޖެހޭނީ އެ މަހެއްގައި އައި ޓޫރިސްޓުން ހިސާބުކުރުމަށްފަހު އެ މަސް ނިމޭ ދުވަހުން ފެށިގެން ތިންވަނައަށްވާ މަހުގެ 28 ވަނ ދުވަހުގެ ކުރިން ކަމށްވެސް ގަވާއިދުގައި ބަޔާންކުރެ އެވެ.

Advertisement

އަދި މި ގަވައިދުގައި ރިސޯޓްތަކަށް ދަތިނުވާނެ ގޮތަށް ލޯނު ހުރިނަމަ އެކަމަށްވެސް ރިޔާއަތް ކުރެވޭނެ އިސްތިސްނާތައް ހިމަނާފައިވެ އެވެ.

ކަންމިހެން ހުރި ނަމަވެސް، ބައެއް ރިސޯޓް އޯނަރުން ވަނީ އެފަދައިން ޑޮލަރު މާރު ނުކުރެވޭނެ ކަމަށް އެމްއެމްއޭއަށް އަންގާފައެވެ. 

އެ މައްސަލާގައި، ޓުއަރިޒަމް ވިޔަފާރިވެރިން ތިބޭ ވަޓްސް އެޕް ގްރޫޕަކަށް ނަޝީދު ފޮނުއްވި މެސެޖެއްގައި ވިދާޅުވީ، ޓޫރިޒަމް ވިޔަފާރި ތަކުން ދައުލަތަށް ނަގާ ޓެކްސްގެ ބޭރުން ދެން އިތުރު އެއްވެސް ކަމެއް ކުރަން، ރިސޯޓް ހިންގާ ވިޔަފާރިވެރިންނަށް ސަރުކާރުން އަންގައިގެން ނުވާނެ ކަމަށެވެ.

"އަޅުގަނޑުގެ ދެކޭ ގޮތުގައި، ރައްޔިތުން އަމިއްލަ ފައިސާއިން ކުރަން ޖެހޭ ކަންކަން ސަރުކާރަކަށް ނުނިންމޭނެ. ރިސޯޓްތަކުގެ ވެރިން ޓެކްސް ދައްކާ. ބާކީ އެއީ އެމީހުންގެ އަމިއްލަ ފައިސާ. ބަހައްޓަން ބޭނުންވާ ތަނެއްގައި ބެހެއްޓެން ވާނެ. ހަރަދުކުރަންވީ ގޮތެއް ވެސް އެ މީހުންނަށް ނިންމެން ވާނެ،" ނަޝީދުގެ މެސެޖުގައި ލިޔުއްވާފައިވެ އެވެ.

އެ މަނިކުފާނު ވިދާޅުވީ ފޮރިން ރިޒާވު ސަރުކާރަށް އިތުރު ނުކުރެވޭ ކަމަށާ އެ ކަން ސަރުކާރުން ގަބޫލު ކުރަންޖެހޭ ކަމަށެވެ. އަދި ސަރުކާރަށް ދައްކަން ޖެހިފައިވާ ދަރަންޏަށް ބަލާއިރު ކިތަންމެ ވަރަކަށް ޓެކްސް ބޮޑުކޮށްވެން ވެސް އެ ވަރުގެ އާމްދަނީއެއް ހޯދޭނެ ކަމަށް ގަބޫލުކުރަން ދަތި ކަމަށާ، މި ހުރިހާ ކަމަކަށް އޮތް ހައްލަކީ، ދަރަނި ދެއްކުން ފަސްކުރުމާއި މުރާޖާ ކުރުން ކަމަށް އެމަނިކުފާނު ވިދާޅުވިއެވެ.

ނަޝީދު މިހެން ވިދާޅުވެފައި ވާއިރު، މިހާތަނަށް 173 ރިސޯޓަކުން ވަނީ މަނީ އެކްސްޗޭންޖުގެ އާ ގަވައިދުގެ ދަށުން އެމްއެމްއޭގައި ރަޖިސްޓްރީކޮށްފަ އަދި އަލަށް ހުޅުވަން ތައްޔާރުވާ 12 ވަރަކަށް ތަންވެސް ވަނީ ރަޖިސްޓްރީކޮށްފަ އެވެ.