އިލެކްޝަންސް ކޮމިޝަނުގެ ރައީސްކަމުގެ މަގާމުގައި ހުންނެވި ފުއާދު ތައުފީގުގެ ރައީސްކަމުގެ ދައުރު ހަމަވެއްޖެއެވެ.

އިލެކްޝަންސްގެ ރައީސް ފުއާދުގެ ދައުރު މިއަދަށް ހަމަވިއިރު، މިއީ އީސީގެ ރައީސްކަމުގެ މަގާމް ފުއާދަށް ފުރުއްވޭނެ އެންމެ ފަހު ފަހަރެވެ. އިލެކްޝަން ކޮމިޝަނުގެ ގަވާއިދު ބުނާގޮތުން ދެ ދައުރަށް ވުރެ ގިނައިން ކޮމިޝަނުގެ މެމްބަރުކަމުގައި ނުުންނެވޭނެއެވެ.

ފުއާދު ތައުފީގް އެންމެ ފުރަތަމަ އިލެކްޝަންސް ކޮމިޝަނުގެ މެމްބަރެއްގެ ގޮތުގައި ހުންނެވީ، 2008 ވަނަ އަހަރެވެ. އޭރުއެއީ ރާއްޖެއަށް ސިޔާސީޕާޓީތައް ތައާރަފްވެ، އެންމެފުރަތަމަ ގިނަ ޕާޓީތަކެއް ބައިވެރިވެގެން އިންތިހާބު ބޭއްވި އަހަރެވެ. އެއަށްފަހު ދެން އިެލކްޝަނުގެ މެމްބަރުކަމަށް ފުއާދު ވަޑައިގެންނެވީ 2019 ވަނަ އަހަރެވެ. ފުއާދު ކޮމިޝަނުގެ ރައީސްކަމުގެ މަގާމަށް އައްޔަނުކުރެވުނީ، 2021 ވަނަ އަހަރު އޭރު ކޮމިޝަނުގެ ރައީސަކަށް ހުންނެވި އަހުމަދުޔ ޝަރީފް މަގާމުން އިސްތިއުފާދިނުމުންނެވެ.

Advertisement

ފުއާދު ތައުފީގަކީ އިލެކްޝަންސް ކޮމިޝަނުގައި އެންމެ ގިނަދުވަސްވަންދެން މަސައްކަތްކުރައްވައި އެ ދާއިރާގައި ހުރި ރާއްޖޭގެ އެންމެ ތަޖުރިބާކާރު ބޭފުޅާއެވެ. ގިނަބައެއްގެ މަގުބޫލުކަން ލިބިވަޑައިެގންފައިވާ ފުއާދު ތައުފީގަކީ ތަފާސްހިސާބުގެ އިލްމުން ރާއްޖޭގައި އެންމެ ފުންނާބުއުސް އެއް އިލްމުވެރިޔާއެވެ. 

ގިނަބަޔަކު ފުއާދު ތައުފީގް ފާހަގަކުރައްވަނީ ކެތްތެރިކަމުގެ ގޮތުން އެފަދަ ދެވަނައެއްނުވާ ބޭފުޅެއްގެ ގޮތުގައެވެ. އެގޮތުން މިދިޔަ އަހަރުގެ ރިޔާސީ އިންތިހާބު ކައިރިވެފައިވަނިކޮށް އިލެކްޝަންސް ކޮމިޝަންގެ މަސައްކަތްތައް އެންމެ ބާރުބޮޑުވެގެން ދިޔަ ދުވަސްވަރު ފުއާދު ތައުފީގުގެ ދަރިކަލުން އަހުމަދު ފުއާދު ނިޔާވި ހަބަރާއެކުވެސް އެދުވަހު އޮފީހަށް ނިކުންނަވައި ގައުމީ ވާޖިބުތައް އަދާކުރެއްވުމަށް ދެއްކި ހިތްވަރު ފާހަގަކޮށްލެވެއެވެ.