ލަންޑަނުގައި ބޭއްވުނު ގިނަސް ވޯލްޑް ރެކޯޑްސް ދުވަހުގެ މުނާސަބަތުގައި، ދުނިޔޭގެ އެންމެ ދިގު އަންހެން މީހާއާއި އެންމެ ކުރު އަންހެން މީހާ ހަވީރުގެ ސައިފޮދަކަށް ބައްދަލުކޮށްފިއެވެ. މި ދެ މީހުން ބައްދަލުކުރީ ލަންޑަނުގެ މަޝްހޫރު ސަވޯއި ހޮޓެލްގައެވެ.

ދުނިޔޭގެ އެންމެ ދިގު އަންހެން މީހާ ކަމަށްވާ ޓާކީގެ ރުމެއިސާ ގެލްގީގެ އިސްކޮޅަކީ 215.16 ސެންޓިމީޓަރެވެ(7 ފޫޓު 07އިންޗި). އަދި ދުނިޔޭގެ އެންމެ ކުރު އަންހެން މީހާ ކަމަށްވާ އިންޑިއާގެ ޖިޔޯޓީ އަމްގޭގެ އިސްކޮޅަކީ 62.8 ސެންޓިމީޓަރެވެ. (2 ފޫޓު 07 އިންޗި). މި ދެމީހުންގެ އިސްކޮޅުގެ ތަފާތަކީ 152.36 ސެންޓިމީޓަރެވެ. (5ފޫޓު)

މި ދެމީހުންގެ ބައްދަލު ވުމާއި ގުޅިގެން ގެލްގީ ބުނެފައިވަނީ، އެއީ ތަފާތު ތަޖުރިބާއެއް ކަމަށެވެ.

Advertisement

"އަޅުގަނޑުމެން ދެމީހުންގެ ވެސް ވަރަށް ގިނަ ކަންތައްތައް އެއްގޮތޭ. އަޅުގަނޑުމެން ދެމީހުންނަށް ވެސް މޭކަޕާއި، ސެލްފް-ކެއަރއާއި، ގަހަނާއާއި، ނިޔަފަތި ރީތި ކުރުމަށް ލޯބިކުރަން. އިސްކޮޅުގެ ތަފާތުގެ ސަބަބުން އެކަކު އަނެކެއްގެ ލޮލަށް ބެލުމަށް އުނދަގޫވި ނަމަވެސް، މިއީ ވަރަށް ތަފާތު ތަޖުރިބާއެއް" ގެލްގީ ބުނެފައިވެއެވެ.

ޖިޔޯޓީ އަމްގޭ ބުނެފައިވަނީ، އޭނާއާ އެއްފަދަ ރެކޯޑް ހޯލްޑަރަކާ ބައްދަލުވީތީ ވަރަށް އުފާވެފައިވާ ކަމަށެވެ.

ވެބް ޑިޒައިނަރެއް ކަމަށްވާ ގެލްގީއަކީ 2021 ވަނަ އަހަރު ދުނިޔޭގެ އެންމެ ދިގު އަންހެން މީހާގެ ގޮތުގައި ކަނޑައެޅުނު މީހާއެވެ. އޭނާގެ އިސްކޮޅު މިހާ ދިގުވެފައިވަނީ ވީވަރ ސިންޑްރޯމް ކިޔާ ވަރަށް މަދުން ޖެހޭ ބައްޔެއްގެ ސަބަބުންނެވެ. ގިނަސް ވޯލްޑް ރެކޯޑްސްގެ މަޢުލޫމާތު ދައްކާ ގޮތުގައި، މުޅި ދުނިޔޭގައި މި ބަލި ޖެހިފައިވަނީ އެންމެ 27 މީހުންނަށެވެ.

27 އަހަރުގެ ގެލްގީ އަކީ އެންމެ ބޮޑު އަތް ހުރި އަންހެން މީހާ އަދި އެންމެ ދިގު ބުރަކަށި ހުރި އަންހެން މީހާގެ ރެކޯޑު ވެސް އޮތް މީހާއެވެ. މީގެ އިތުރުން އޭނާއަކީ އެންމެ ދިގު ކަންފަތް ހުރި އަންހެން މީހާގެ ރެކޯޑު ވެސް އޮތް މީހާއެވެ.

އެކްޓްރެސްއަކާއި މީޑިއާ ޝަޚްޞިއްޔަތެއް ކަމަށްވާ އަމްގޭއަށް ޖެހިފައިވަނީ އެކޮންޑްރޮޕްލޭޒިއާ ކިޔާ ކަށީގެ ބައްޔެކެވެ. މި ބަލީގެ ސަބަބުން އަތާއި ފައިގެ ކަށިތައް އާންމު މީހުންނާ އަޅާބަލާއިރު ކުރުވެފައި ހުރެއެވެ. މި ހާލަތު ދިމާވަނީ މަންމަގެ ބަނޑުގައި ކުއްޖާ އުފެދެމުންދާއިރު ވަރަށް ކުރީކޮޅުގައެވެ. އަދި މި ބަލީގެ ސަބަބުން އަސަރުކުރަނީ ކުއްޖާގެ އަތްތަކާއި ފައިތަކަށް ވާންޖެހޭ ކާޓިލޭޖް (ގާކަށި) ޓިޝޫއަށެވެ.

ގިނަސް ވޯލްޑް ރެކޯޑްސް ދުވަހަކީ ކޮންމެ އަހަރެއްގެ ނޮވެމްބަރު މަހުގެ މެދުތެރޭގައި ފާހަގަކުރާ ދުވަހެކެވެ. މި ދުވަހުގެ މަޤްޞަދަކީ ދުނިޔޭގެ އެކި ކަންކޮޅުތަކުގައި ތިބި ރެކޯޑު ހޯލްޑަރުންނާއި ރެކޯޑު ހެދުމަށް މަސައްކަތްކުރާ ފަރާތްތައް އެއްތަނަކަށް ގެނެސް، އެމީހުންގެ އުފެއްދުންތެރިކަމާއި ޤާބިލުކަން ފާހަގަކުރުމެވެ.