މަސްތުވާތަކެތީގެ ވަބާއިން އެއްކޮށް ރާއްޖެ ސަލާމަތްކުރުމަކީ، އެންމެ އިސްކަންދޭ އެއްކަންތައްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިމޭރުމުން ވިދާޅުވެފައިވަނީ، ރާއްޖެ ސަރަހައްދުގައި އުޅެނިކޮށް ކޯސްޓްގާޑުން ހިފެހެއްޓި ލަންކާގެ މަސްބޯޓަކުން، އެއް ބިލިއަން ރުފިޔާގެ މަސްތުވާތަކެތި ފެނިފައިވާކަމަށް ފުލުހުން މިއަދު ހާމަކުރުމާ ގުޅިގެންނެވެ. 

މިކަމާ ގުޅިގެން ރައީސް ޑރ.މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ ސަރުކާރުން އެއްމެ އިސްކަންދޭ އެއްކަންތައް ކަމަށެވެ. ރައީސް ވަނީ  ޤާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުންގެންދާ ބުރަމަސައްކަތް ފާހަގަކޮށް އެފަރާތްތަކަށް ޝުކުރު ދަންނަވާފައެވެ.

Advertisement

ކުނުދޫ ބޭރުގައި އުޅެނިކޮށް އެމްއެންޑިއެފްގެ ބެލުމުގެ ދަށަށް ރޭގެ ވަގުތެއްގައި ގެނެވުނު ސްރީލަންކާގެ މަސްބޯޓުން، 468.6 ކިލޯގެ މަސްތުވާތަކެތި ފެނިފައިވާކަމަށް ފުލުހުން މިއަދު ވަނީ ހާމަކޮށްފައެވެ. މިތަކެތީގެ އަގު 1 ބިލިއަން ރުފިޔާއަށް އަރާކަމަށްވެސް ފުލުހުން ބުންޏެވެ. އަތުލައިގަތް މަސްތުވާތަކެތީގެ ބިޔަ ޝިޕްމަންޓްގައި 344 ކިލޯގެ ކްރިސްޓަލް މެތްގެ އިތުރުން 124.7 ކިލޯގެ ހެރޮއިން ހިމެނެއެވެ.

މިކަމާ ގުޅޭގޮތުން ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް މަޢުލޫމާތު ހިއްސާކުރައްވަމުން ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވީ، އެ އުޅަނދު ރާއްޖެ ސަރަހައްދުގައި މަކުނުދޫ ބޭރުގައި ހަރަކާތްތެރިވާކަން އެމްއެންޑީއެފަށް އެނގުނީ ރޭ ދަންވަރު 12:45 ހާއިރުކަމަށެވެ. ސްރީލަންކާގެ އަށެންފުތަ ނަމަކަށް ކިޔާ އެ މަސް ބޯޓުގައި އެ ޤައުމަށް ނިސްބަތްވާ 5 މީހުން ތިބިކަމަށް އޭނާ ވިދާޅުވިއެވެ. އެއީ ހުސް ފިރިހެނުންނެވެ.