ރާއްޖެއާ ދުރުން ކޮޅިގަނޑެއް އުފެދިފައިވާތީވެ، އަންނަ ބުދަ ދުވަހުން ފެށިގެން ކުރިއަށްއޮތް 5 ދުވަހު ރާއްޖޭގެ ސަރަހައްދަށް މޫސުން ވަރަށް ގޯސްވެދާނެކަމަށް މޫސުމާ ބެހޭ ގައުމީ އިދާރާއިން ލަފާކޮށްފިއެވެ.

މޯލްޑިވްސް މީޓިއޮލޮޖިކަލް ސެންޓަރުން ބުނީ، ރާއްޖޭގެ އިރުން ބޭ އޮފް ބެންގަލްގައި އުފެދިފައިވާ ކޮޅިގަނޑު ކުރިއަށްއޮތް 24 ގަޑިއިރުގެ ތެރޭގައި އިތުރަށް ބާރުގަދަވާނޭކަމަށް ބެލެވޭކަމަށެވެ. މި ކޮޅިގަނޑު ދަތުރުކުރާނޭކަމަށް ބެލެވެނީ ހުޅަނގު އުތުރަށް އިންޑިއާގެ ޓެމިލްނާޑޫ އަދި ސްރީލަންކާގެ އައްސޭރިފަށާ ދިމާލަށެވެ. އަދި މީގެ އިތުރުން ރާއްޖެއާ ދުރުން، ރާއްޖޭގެ އިރުދެކުނުގައިވެސް ކޮޅިގަނޑެއް އުފެދިފައިވާކަމަށް މެޓް އޮފީހުން ބުނެއެވެ.

އެއިދާރާއިން ބުނީ މި ދެ ކޮޅިގަނޑާއި ގުޅިގެން ނޮވެމްބަރުމަހުގެ 27 ވާ ބުދަދުވަހުން ފެށިގެން ކުރިއަށްއޮތް 5 ދުވަހު ރާއްޖޭގެ ސަރަހައްދަށް ވައިބާރުވާނޭކަމަށް ބެލެވޭކަމަށެވެ. އާއްމުގޮތެއްގައި ވައިގެ ބާރުމިން ހުންނާނީ ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައެވެ. އުތުރުގެ އަތޮޅުތަކަށް ވައިގެ ބާރުމިން ހުންނާނީ 13 މޭލާއި 23 މޭލާ ދެމެދުގެ ބާރުމިނެއްގައެވެ. މެޓް އޮފީހުން ބުނީ މި ސަބަބަށްޓަކައި ރާއްޖޭގެ ހުރިހާ ސަރަހައްދެއްގެ ކަނޑުތައް ގަދަވާނޭކަމަށް ލަފާކުރެވޭ ކަމަށެވެ.

މެޓް އޮފީހުން ވަނީ މޫސުން ގޯސްވާ ދުވަސްވަރު ހުރިހާ ފަރާތްތަކަކުންވެސް ކަނޑުދަތުރުކުރުމަށް ސަމާލުކަން ދިނުމަށް އެދިފައެވެ. އަދި ހާއްސަ ގޮތެއްގައި ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށްވެސް ވަނީ އިލްތިމާސްކޮށްފައެވެ. މޫސުން ގޯސް ދުވަސްވަރު ކަނޑުދަތުރުތަކުގައި މީހުންގެ ފުރާނަ ގެއްލުމުގެ ހިތާމަވެރި ހާދިސާތަށް މި ފަހުންވެސް ރާއްޖޭގައި ހިނގާފައި އެބަހުއްޓެވެ.