ހުޅުމާލޭ މަގުތަކުގެ ޓްރެފިކް މެނޭޖްކުރުމަށް ހަދާފައިވާ ވަށްބުރުތަކުގައި ބަހައްޓާނެ މޮނިއުމަންޓްތައް ހެދުމަށް ހުޅުވާލި ފުރުސަތުގައި އެއްވަނައަށް ހޮވުނު ފަރާތުގެ މޮނިއުމަންޓް އިތުރަށް މުރާޖައާކުރުމަށް އެޗްޑީސީން ނިންމައިފިއެވެ.

މިކަމާ ގުޅިގެން އެޗްޑީސީން ނެރެފައިވާ ބަޔާނެއްގައި ބުނެފައިވަނީ، މޮނިއުމަންޓް ހުށަހެޅުމަށް ހުޅުވާލި ފުރުސަތުގައި ޖުމްލަ 7 ފަރާތަކުން ޑިޒައިންތައް ހުށަހަޅާފައިވާކަމަށެވެ. އެ ހުށަހެޅުންތަކުގެ މެދުގައި ވަނަހޮވާފައިވާނީ އެކަމަށްޓަކައި ކަނޑައެޅިފައިވާ ޕްރޮފެޝަނަލް ސްޓާފުންގެ ޖަޖިން ޕެނަލަކުން ހުށަހެޅުންތައް އިވެލުއޭޓް ކުރުމަށްފަހުކަމަށް އެޗްޑީސީން ބުންޏެވެ. 

އެޗްޑީސީން ބުނީ މުބާރާތުން އެއްވަނައަށްދިޔަ މޮނިއުމަންޓް ޑިޒައިންތަކަކީ އޭއައި ޖެނެރޭޓެޑް ޑިޒައިންތަކެއް ކަމަށް ބުނެ އާންމުންގެ ޝަކުވާ އެ ކޯޕަރޭޝަނަށް ލިބުމުން އެ ޝަކުވާތަށްބަލައި، ވަނަ ލިބުނު ޑިޒައިންތައް މުރާޖައާކުރުމުގެ މަސައްކަތް ކުރަމުން އަންނަ ކަމަށެވެ. މުބާރާތުގެ މަގްސަދަކީ ހުޅުމާލޭގެ ތަރައްޤީއަށް ކުރަމުން އަންނަ މަސައްކަތުގައި ދިވެހިންގެ ފަންނުވެރިންގެ ހިޔާލާއި ވިސްނުން ހިމެނުންކަމުގައި ވާތީ، މިފަދަ މުބާރާތްތަކުގައި ދިވެހި ފަންނުވެރިންނަށް ފުރުސަތު ނުލިބޭގޮތަށް އެޗްޑީސީން އަމަލު ނުކުރާނޭކަމަށް އެ ކޯޕަރޭޝަނުން ބުންޏެވެ.

Advertisement

އެޗްޑީސީން ބުނީ އެ ކޯޕަރޭޝަނުގެ ހުރިހާ މަސައްކަތްތަކަކީވެސް ރައްޔިތުންނަށް ދެފުށް ފެންނަ ގޮތަށް ކުރިއަށްގެންދާ މަސައްކަތްތަކަކަށް ހެދުމަކީ އަމާޒު ކަމަށާއި، މިފަދަ ކަންކަމުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކުރާކަމަށެވެ.

އެޗްޑީސީން ވަނީ ހުޅުމާލޭގެ 17 ސަރަހައްދެއްގެ މަގުތަކުގައި މޮނިއުމަންޓުތައް ބެހެއްޓުމަށް ނިންމާފައެވެ. އެ މުބާރާތުގެ އެއްވަނައަށްދާ ޑިޒައިނަށް އިނާމެއްގެ ގޮތުގައި ދިނުމަށް ކަނޑައަޅާފައިވަނީ، 100،000 ރުފިޔާއެވެ.