އޮކްސްފޯޑް ޔުނިވަރސިޓީގެ މަޝްހޫރު ޑިބޭޓިންގ ސޮސައިޓީ، އޮކްސްފޯޑް ޔޫނިއަނުން އިސްރާއީލަކީ ނަސްލީ ތަފާތުކުރުން ގެންގުޅޭ، ފަލަސްތީނުގައި ގަތުލުޢާއްމު ހިންގަމުންދާ ބައެއްކަމަށް ފާސްކޮށްފިއެވެ.

ބުރާސްފަތި ދުވަހު ބޭއްވުނު މި ޑިބޭޓުގައި 278 މެންބަރުން ވޯޓުދިނީ މި ހުށަހެޅުމަށް ތާއީދުކޮށެވެ. އަދި 59 މެންބަރުން ވޯޓުދިނީ މި ހުށަހެޅުމާ ދެކޮޅަށެވެ.

މި ޑިބޭޓުގައި ތާއީދުކޮށް ވާހަކަދެއްކި ފަރާތްތަކުގެ ތެރޭގައި އިސްރާއީލް-އެމެރިކާ އެކްޓިވިސްޓް މީކޯ ޕެލެޑް، ފަލަސްތީނު ޝާޢިރު މުޙައްމަދު އަލް-ކުރުދު އަދި މަޝްހޫރު ލިޔުންތެރިޔާ ސޫސަން އަބުލްހަވާ ހިމެނެއެވެ.

އޮކްސްފޯޑް ޔޫނިއަންގެ ރައީސް އިބްރާހީމް ޢުޘްމާން-މުވާފީ ވެސް މި ހުށަހެޅުމަށް ތާއީދުކޮށް ވާހަކަދެއްކިއެވެ. އޭނާ ވާހަކަދައްކަމުން، އިސްރާއީލުގެ ޢުދުވާނީ ޙަމަލާއެއްގައި ގައްޒާގެ ހޮސްޕިޓަލެއްގައި 19 އަހަރުގެ ޝަބާން އަލް-ދަލޫމް އަނދައި މަރުވި ހިތާމަވެރި ހާދިސާ ހަނދާންކޮށްދިނެވެ. އަދި މިހާރު ގައްޒާގައި ހިނގަމުންދާ އަނިޔާވެރި ޢަމަލުތަކަކީ އިސްރާއީލުން ގައްޒާގެ ރައްޔިތުންނާ ދެކޮޅަށް ހިންގަމުންދާ "ހޮލޯކޯސްޓެއް" ކަމަށް އޭނާ ބުންޏެވެ.

މި ޑިބޭޓް ބާއްވާފައި މިވަނީ އިސްރާއީލުން ގައްޒާގައި ހިންގަމުންދާ ގަތުލް އާއްމު ހުއްޓުމެއްނެތި އިތުރަށް ވަރުގަދަކުރަމުންދާ ދަނޑިވަޅެއްގައެވެ. އިސްރާއީލުގެ ޙަމަލާތަކުގައި ގައްޒާގެ ގިނަ އަދަދެއްގެ ހޮސްޕިޓަލުތަކާއި، ގެދޮރާއި، މުހިންމު ވަސީލަތްތައް ހަލާކުވެ، އިންސާނީ ބޮޑު ކާރިސާއަކަށް މަގުފަހިވެފައިވެއެވެ. މީގެ އިތުރުން، ގައްޒާގެ އާބާދީގެ ގާތްގަނޑަކަށް އެންމެން ވަނީ ގެދޮރު ދޫކޮށްދާން މަޖުބޫރުވެފައެވެ.

2023 ވަނަ އަހަރުގެ އޮކްޓޯބަރ މަހުގެ 7 ވަނަ ދުވަހުން ފެށިގެން އިސްރާއީލުން ފަލަސްތީނަށް އަމާޒުކޮށް ދެމުންދާ ޢުދުވާނީ ޙަމަލާތަކުގައި މިހާތަނަށް 44،363 އަށްވުރެ ގިނަ ފަލަސްތީނުގެ މުސްލިމުން ޝަހީދުވެފައިވާއިރު، 105،070 އަށްވުރެ ގިނަ މީހުންނަށް އަނިޔާވެފައިވެއެވެ. ޝަހީދުންގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި އެތައް ހާސް މީހުން ވަނީ ގެދޮރު ހަލާކުވެ އެކި ސަރަޙައްދުތަކުގައި ވީނުވީއެއް ނޭނގި ގެއްލިފައެވެ.