ޑިސެމްބަރުމަހުގެ 15 ވަނަ ދުވަހު ކްރިމިނަލްކޯޓު ރިސެސްއަށްދިއުމަށް ނިންމައިފިއެވެ.

ކްރިމިނަލްކޯޓުން ނެރެފައިވާ ބަޔާނެއްގައި ބުނެފައިވަނީ، ޑިސެމްބަރު 15 އިން 31 ވަނަ ދުވަހަށް އެ ކޯޓް ރިސެސްއަށް ދާން އެކޯޓުގެ ޤާޟީންގެ މަޖިލީހުން ނިންމާފައިވާކަމަށެވެ. އެ ބަޔާނުގައި ބުނެފައިވަނީ، ކޯޓު އިމާރާތަށް ދިމާވެފައިވާ ޖާގައިގެ ދަތިކަން އަދިވެސް ހައްލުވެފައިނުވާތީވެ، މިވަގުތުވެސް ކޯޓުން މަސައްކަތްކުރަނީ ޝަރީއަތްކުރާ މާލަންތައް އެކި ޤާޟީންނަށް އެކި ދުވަސްތަކަށް ބަހާލައިގެން ކަމަށެވެ. ކޯޓުން އެންމެ ބޭނުންވާ މިންވަރަށް އަޑުއެހުންތައް ތާވަލްކުރުމަށް ގޮންޖެހުންތައް ހުރުމުން، ޑިސެމްބަރުމަސް އެއްކޮށް ރިސެސްއަށް ނުދިއުމަށް ނިންމާފައިވާކަން ކްރިމިނަލް ކޯޓުން ވަނީ ފާހަގަކޮށްފައެވެ. ނަމަވެސް ހުޅުމާލޭގައި ހުންނަ ކުރިން ކޮވިޑް ފެސިލިޓީގެ ގޮތުގައި ބޭނުންކުރަމުންދިޔަ އިމާރާތަށް ކޯޓުގެ މަސައްކަތްތައް ބަދަލުކުރެވިއްޖެނަމަ، ކޯޓުގެ ޖާގައިގެ ދަތިކަމަށް ހައްލުލިބި މައްސަލަތައް އަވަސްވާނޭކަމަށް ގަބޫލުކުރެވޭކަމަށް ކްރިމިނަލް ކޯޓުން ވަނީ ބުނެފައެވެ.

ނޮވެމްބަރުމަހުގެ ނިޔަލަށް ކްރިމިނަލް ކޯޓުން ނިންމި މައްސަލަތަކުގެ ތެރޭގައި:

- 7،958 ޤަޞިއްޔާގެ އަޑުއެހުން ތާވަލްކުރި

- 515 ޤަޟިއްޔާ ކޯޓުން ނިންމި

- 2،615 މީހުންގެ ބަންދާ މެދު ގޮތެއް ނިންމި

- 2،043 ތަފާތު އެކި ކޯޓް އަމުރު ދޫކުރި

ކްރިމިނަލް ކޯޓުން ބުނީ އެ މުއްދަތުގެ ތެރޭގައި ކޯޓް ރެސިސްއަށް ދިޔަނަމަވެސް، ކޮންމެހެން ކުރަންޖެހޭ ކަންކަން ކުރަމުންދާނޭކަމަށެވެ. އޭގެ ތެރޭގައި :

- ކޯޓުގެ އިމާރާތް ބަދަލުކުރުމަށް ކުރަންޖެހޭ މަސައްކަތްތައް ރާވައި ތަރުތީބުކުރުން.

- ބަންދާމެދު ގޮތެއް ނިންމުމުގެ އަޑުއެހުންތައް ކުރިއަށް ގެންދިއުން.

- ތަފާތު އެކި ކޯޓު އަމުރު ދޫކުރުމުގެ މަސައްކަތް.

- ހޭބިއަސް ކޯޕަސް އަމުރުތަކާއި މުދާ ދޫކުރުމަށް އެދި ހުށަހަޅާ މައްސަލަތައް.

- ޝަރީއަތް ނިމެންދެން ބަންދުކޮށްފައި ތިބި މީހުންގެ މައްސަލަތަކާއި، ގާނޫނާއު ގަވާއިދުގައި ވަކި މުއްދަތެއްގެ ތެރޭގައި ނިމެންޖެހޭނެކަމަށް ކަނޑައަޅާފައިވާ ކަންތައްތައް ކުރިއަށް ގެންދިއުން.

- އިމާރާތުގެ ޖާގައިގެ ދަތިކަމުގެ ސަބަބުން ދެ އިމާރާތެއްގައި ކޯޓުން މަސައްކަތް ކުރަން ޖެހިފައި ވާތީ، އިދާރީ ގޮތުން ދިމާވާ ދަތިތައް ހައްލުކޮށް ހަރުދަނާކުރުމަށްޓަކައި މަސައްކަތްތައް އިންތިޒާމުކުރުމާއި މިކަމާއި ގުޅިގެން އިދާރީ އެސްއޯޕީތަކާއި މުއައްޒަފުންނާއި ގުޅުންހުރި އުސޫލުތައް ތައްޔާރުކުރުމާއި އަންނަ އަހަރަށް ތައްޔާރުވުމުގެ ގޮތުން އިދާރީ ގޮތުން ކުރަންހުރި މަސައްކަތްތައް ކުރުން.