މިއަހަރުގެ ނޮވެމްބަރު މަހުގެ ނިޔަލަށް ރާއްޖެއަށް 1.8 މިލިއަން ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ބެހޭ ވުޒާރާއިން އާއްމުކުރާ ފަތުރުވެރިކަމުގެ ޑެއިލީ ރިޕޯޓްސްއިން ދައްކާގޮތުގައި، މިދިޔަ މަހުގެ 30 ވަނަ ދުވަހާއި ހަމައަށް ރާއްޖެއަށް ޖުމްލަ 1,837,633 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 1,683,847 އާއި އަޅާ ބަލާއިރު، 9.1 އިންސައްތައިގައި ކުރި އެރުމެކެވެ.

މިދިޔަ މަހު އެންމެ ގިނަ ފަތުރުވެރިން ޒިޔާރަތްކޮށްފައިވަނީ މިދިޔަ ހޮނިހިރު ދުވަހުއެވެ. މިގޮތުން އެދުވަހު ރާއްޖެއަށް 7,165 ފަތުރުވެރިން ވަނީ ޒިޔާރަތްކޮށްފައެވެ.

Advertisement

މިހާތަނަށް ރާއްޖެއަށް ޒިޔާރަތްކުރި 1.8 މިލިއަން ފަތުރުވެރިންގެ ތެރެއިން އެންމެ ގިނައީ ޗައިނާއިން ރާއްޖެއަށް ޒިޔާރަތްކުރި  ފަތުރުވެރިންނެވެ. ޗައިނާއިން ރާއްޖެއަށް 251,065 ފަތުރުވެރިން ޒިޔާރަތްކުރިއިރު، އެގައުމު އޮތީ 13.7 އިންސައްތައިގެ މާކެޓް ޝެއާ އާއިއެކު، ރާއްޖޭގެ ފަތުރުވެރިކަމުގެ މާކެޓްގެ އެއްވަނައިގައެވެ.

ޖުމްލަ 205,198 ފަތުރުވެރިންނާއި އެކު ރަޝިއާ ދެވަނައިގައި އޮތް އިރު މާކެޓްގެ ތިން ވަނައިގައި އޮތީ 160,433 ފަތުރުވެރިންނާއިއެކު އިނގިރޭސިވިލާތެވެ. 

މި އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ އަށް ގެނައުމަކީ ސަރުކާރުގެ އަމާޒެއްކަން ފާހަގަކޮށްލަން ޖެހެއެވެ.

މީގެ ކުރިން ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ހާމަކުރެއްވި ގޮތުގައި، ފަތުރުވެރިކަމާއި ބެހޭ ވުޒާރާގެ ތަފާސްހިސާބުތައް ދައްކާގޮތުން އަދި މިހާރު އެރައިވަލްސް ހުރި ވަރަށް ބަލާއިރު، އެންމެ ލަސްވެގެން މިއަހަރުގެ ޑިސެމްބަރު މަހުގެ 25 ގައި 2 މިލިއަން ފަތުރުވެރިން ގެނައުމަށް ސަރުކާރުން ހިފާފައިވާ އަމާޒު ހާސިލްވާނެއެވެ.