އިޒްރޭލު-ލުބްނާނު ސުލްހައިގެ އެއްބަސްވުން ދެމިނޯންނާނެކަމުގެ ބިރާއި، އަދި ޗައިނާގެ ފެކްޓްރީތަކުގެ މަސައްކަތް އިތުރުވަމުން އަންނަކަމަށް ތަފާސް ހިސާބުތަކުން ދެއްކުމާ ގުޅިގެން ދުނިޔޭގެ ބާޒާރުގައި ތެލުގެ އަގު ކުޑަކޮށް މައްޗަށް ޖެހިލައިފިއެވެ.

ތެލުގެ އަގު އެވްރެޖްކޮށް މިއަދު ވަނީ 10 ސެންޓު މައްޗަށް ޖެހިލާފައެވެ. ދުނިޔޭގެ ތެލުގެ ބާޒާރުގައި ތެޔޮ ފީފާއެއް މިހާރު ހުރީ އެވްރެޖްކޮށް 72 ޑޮލަރުގައެވެ. އަދި އެމެރިކާގެ ބާޒާރުގައި ފީފާއެއް މިހާރު ހުރީ 68.5 ޑޮލަރުގައެވެ. ޑޮލަރުގެ އަގު ކުޑަކޮށް މައްޗަށް ޖެހިފައިމިވަނީ، އެމެރިކާގެ ރައީސްކަމާ ޑޮނަލްޑް ޓްރަމްޕް ހަވާލުވުމަށްފަހު ޗައިނާއިން އެތެރެކުރާ މުދަލުން ނަގާ ޓެރިފް ބޮޑުކުރާނެކަމުގެ އިންޒާރު ދެއްވާފައި ވަނިކޮށެވެ.

އަދި އެ އިންޒާރާއެކު ޗައިނާގެ ފެކްޓްރީތަކުގެ ހަރަކާތްތަކަށް އަންނަ ބަދަލުތައް މާކެޓް ދިރާސާކުރާ ފަރާތްތަކުން ދަނީ ވަރަށް ކައިރިން ބަލަމުންނެވެ. އަނެއްކޮޅުން އިޒްރޭލާއި ލުބްނާނާއި ދެމެދު ހިނގަމުންދާ ކުރިމަތިލުންތަކަކީވެސް މިވަގުތު ތެލުގެ އަގަށް އަސަރުކުރުވަމުންދާ ކަންތައްތަކެކެވެ. ދެފަރާތުން ހަމަލާ ބަދަލުކުރުން ހުއްޓާލުމަށް މިދިޔަ ބުދަ ދުވަހު އެއްބަސްވިނަމަވެސް، ދެ ފަރާތުންވެސް ދަނީ އަނެއް ފަރާތުން ހަމަލާބަދަލުކުރުން ހުއްޓާލުމުގެ އެއްބަސްވުމާ ޚިލާފުވަމުންދާކަމަށް ތުހުމަތުކުރަމުންނެވެ. އެހެންކަމުން މާގިނަ ދުވަހަކު މި އެއްބަސްވުން ދެމި ނޯންނާނެކަމަށް މުހައްލިލުން އަންދާޒާކުރެއެވެ.ތެލުގެ އަގުތަކާއި އަދި ތެޔޮ ނަގާ މިންވަރާ ބެހޭ ގޮތުން މަޝްވަރާކުރުމަށް އޯޕެކް ޤައުމުތަކާއި އޯޕެކް ޕްލަސްގެ ގައުމުތައް މިހަފްތާގައި ބައްދަލުކުރާނެއެވެ.

Advertisement