ރަޝިޔާ-ޔޫކްރެއިން ހަނގުރާމައިގައި ޗައިނާއިން ގެންގުޅޭ ސިޔާސަތަށް ޖަރުމަންވިލާތުގެ ޚާރިޖީ ވަޒީރު އަނެލީނާ ބަޔަބޮކް ފާޑުވިދާޅުވެއްޖެއެވެ.

އެކަމަނާ ޗައިނާއަށް ފާޑުވިދާޅުވީ ޗައިނާގެ އިސް ފަރާތްތަކާއި ބައްދަލުކުރެއްވުމަށް ބެއިޖިންގއަށް ފުރާވަޑައިގަތުމުގެ ކުރިންނެވެ. މިހާރު ބަޔަބޮކް ހުންނެވީ ބެއިޖިންގ ގައެވެ.

އދގެ ސަލާމަތީ މަޖިލީހުގެ ދާއިމީ މެމްބަރެއްގެ ގޮތުގައި އޮވެ، ދުނިޔޭގެ ސަލާމަތާއި ރައްކާތެރިކަމަށް ނަގަން ޖެހޭ ޒިންމާއިން އެކަހެރިވެ، ޗައިނާއިން މަސައްކަތްކުރަނީ ވިލާތުގެ ޤައުމުތަކުގެ މަސްލަހަތާއި ފުށުއަރާގޮތަށް، ރަޝިޔާއަށް އަސްކަރީ އަދި އިގްތިސާދީ އެހީތެރިކަން ފޯރުކޮށްދިނުމަށްކަމަށް ބަޔަބޮކް ތުހުމަތުކުރެއްވިއެވެ. އެކަމަނާ ވިދާޅުވީ ރަޝިޔާއިން ޔޫކްރެއިންއަށް ދެމެންދާ ޙަމަލާތަކަކީ ސުލްހައަށް އޮތް ނުރައްކަލެއް ކަމަށެވެ. އަދި އެކަމަނާ އަޅާ ނުލައި ނުތިބެވޭނެކަމަށާއި، ޗައިނާ ދަތުރުފުޅުގައި އެކަމާ ބެހޭ ގޮތުން މަޝްވަރާކުރައްވާނެކަމަށް ފުރާވަޑައިގަތުމުގެ ކުރިން ޖަރުމަން މީޑިއާތަކާ ބައްދަލުކުރައްވައި އެކަމަނާ ވިދާޅުވިއެވެ.

Advertisement

ޖަރުމަންވިލާތުގެ ޚާރިޖީ ވަޒީރު ޗައިނާއަށް ކުރައްވާ މި ދަތުރުފުޅުގައި މިއަދު ޗައިނާގެ ޚާރިޖީ ވަޒީރު ވާންގް ޔީއާ ބައްދަލުކުރައްވާނެއެވެ. ޗައިނާއިން ރަޝީޔާއަށް އެހީތެރިވާ މައްސަލައަކީ މި ދެބޭފުޅުންގެ މަޝްވަރާގެ އެޖެންޑާގެ އެންމެ ކުރީގައި އޮންނާނެ މައުޟޫކަމަށް ބެލެވެއެވެ. ދެ ޤައުމުގެ ޚާރިޖީ ވަޒީރުން މިއަހަރު މީގެ ކުރިން 2 ފަހަރަކު ބައްދަލުކުރައްވައި، މަޝްވަރާކުރައްވާފައިވެއެވެ.

ވިލާތުގެ އިއްތިޙާދުން ދަނީ ރަޝިޔާއާ ދެކޮޅަށް އަޅާ ދަތިކުރުމުގެ ފިޔަވަޅުތަކުގެ 15 ވަނަ ޕެކޭޖަށް ތައްޔާރުވަމުންނެވެ. ރަޝިޔާގެ ޑްރޯންތަކުގައި ބޭނުންކުރާ ސާމާނު އުފައްދާ ޗައިނާގެ ބައެއް ކުންފުނިތަކާ ދެކޮޅަށްވެސް މިފަހަރު ދަތިކުރުމުގެ ފިޔަވަޅުތައް އަޅާނެކަމަށް ބެލެވެއެވެ.