ނެޝަނަލް ސޯޝަލް ޕްރޮޓަކްޝަން އޭޖެންސީ (އެންސްޕާ) ގެ ބޭނުމަށް، މޯލްޑިވްސް މީޑިއާ ހައުސްއިން ކުއްޔަށްހިފި ތަންތަނުގެ އެއްބަސްވުން އުވާލުމަށް ނިންމައިފިއެވެ.

މިކަމާ ގުޅޭގޮތުން އެންސްޕާއިން ނެރުނު ބަޔާނެއްގައި ބުނީ އެ އެޖެންސީ ހިންގަމުންދާ މޫކައި ސުއިޓު އިމާރާތުގެ މަސައްކަތްކުރުމަށްޓަކައި ހުސްކުރުމަށް އަންގާފައިވާކަމަށެވެ. އެގޮތުން އެ އެޖެންސީ ހިންގުމަށް ތަނެއް މޯލްޑިވްސް މީޑިއާ ހައުސްއިން ތަނެއް ކުއްޔަށް ހިފީ، އެކަން ކުރުމަށް އޮންނަ އުސޫލުގެ ތެރެއިން، ކުރެވުނު އޯޕަން ޓެންޑަރގެ ދަށުންކަމަށް އެންސްޕާއިން ބުންޏެވެ. 

އެންސްޕާއިން ބުނީ އެއްބަސްވުން ނިމުމަކަށް ގެންނަން ބޭނުންވީ މި މުއާމަލާތްތަކާ ގުޅިގެން މޯލްޑިވްސް މީޑިއާ ހައުސްގެ އަގު ވައްޓާލައި އެ ކުންފުނި ބަދުނާމުކުރުމަށް ހަގީގަތާ ހިލާފް އެތައް ވާހަކަތަކެއް ދައްކައި، މީޑިއާގެ އެކި ވަސީލަތްތައް ބޭނުންކޮށްގެން އަސްލެއްނެތް ދޮގު ވާހަކަތައް ފެތުރުމުގެ ސަބަބުން އެކުންފުންޏަށް މާއްދީ ގޮތުންނާއި މައުނަވީގޮތުން ފޫނުބެއްދޭވަރުގެ ގެއްލުންތަކެއް ކުރިމަތިވުމުން ކަމަށެވެ.

މޯލްޑިވްސް މީޑިއާ ހައުސްއާއެކު އެންސްޕާއިން ގާއިމްކުރި އެ އެއްބަސްވުން ނިމުމަކަށް ގެނައުމަށް ނިންމީ ފިނޭންސް މިނިސްޓްރީއަށްވެސް އެންގުމަށްފަހުއެވެ. އެންސްޕާއިން ބުނީ މިކަމާ ގުޅޭގޮތުން އިތުރަށް ކުރަންޖެހޭ މުއާމަލާތްތަކާއި އެއްބަސްވުން ނިމުމަކަށް ގެނައުމަށްފަހު ފުރިހަމަކުރަންޖެހޭ އިޖުރާއަތްތައް ފުރިހަމަކުރުމުގެ މަސައްކަތް މާލީ ވުޒާރާގެ އިރުޝާދުގެ ދަށުން ކުރިއަށްދާަކމަށެވެ.