ދެކުނު ކޮރެއާގެ ރައީސް ޔޫން ސުކް ޔޮލް، މަގާމުން ދުރުކުރުމުގެ މަސައްކަތް ފަށާފައިވާކަމަށް އެޤައުމުގެ އިދިކޮޅު ޕާޓީތަކުން ބުނެފިއެވެ.

ޔޫން މަގާމުން ދުރުކުރުމަށް އިދިކޮޅުން މަސައްކަތް ފަށާފައިމިވަނީ، ރޭގެ ވަގުތެއްގައި ކުއްލި ހާލަތު އިއުލާނުކޮށް އަސްކަރީ ވެރިކަން ހިންގެވުމަށް ނިންމައި، ރައްޔިތުންނާ ދެކޮޅަށް އަސްކަރީ ސިފައިން ނެރުމުންނެވެ. ޔޫން ވަނީ ރޭގެ ވަގުތެއްގައި މާޝަލް ލޯ ހިންގަވަން ނިންމައި ޤައުމުގެ ކަންކަން ހިންގުމަށް ސިފައިން ނެރުއްވާފައެވެ.

އަސްކަރީ ވެރިކަން ހިންގަވަން ނިންމަވައި ޔޫން ވަނީ ގާނޫނުހަދާ މަޖިލީހުގެ ބާރު ކަނޑުވާލައި މަޖިލީހުގެ އިމާރާތުގެ ތެރެއަށް ސިފައިންވަދެ މަޖިލީސް ހައިޖެކްޓްކޮށްފައެވެ. މީގެ އިތުރުން ދައުލަތުގެ އޮފީސްތަކާއި މަގުތަކަށް ނިކުމެ، ސިޔާށީ އެއްވުންތައް ބޭއްވުން ވަނީ މަނާކޮށްފައެވެ. އަދި އެންމެ ފާހަގަކުރެވުނު ކަމަކީ މީޑިއާތަކުގެ ފުލް ކޮންޓްރޯލްވެސް، ސަލާމަތީ ބާރުގެ ދަށަށް ގެނައުމެވެ. މިކަމާ ގުޅިގެން ދެކުނު ކޮރެއާގެ ސޯލްގައި ސިފައިންނާއި އާއްމުންނާ ދެމެދު ކުރިމަތިލުންތައް ވަނީ ހިނގާފައެވެ.

Advertisement

އަސްކަރީ ވެރިކަން ހިންގުމަށް އިއުލާނުކުރެއްވި ނަމަވެސް ރައީސް ޔޫން ވަނީ މަދު ގަޑިއިރެއްގެ ތެރޭގައި ނިންމުން އަނބުރާ ގެންގޮސްފައެވެ. ސަބަބަކީ ގިނަ އަދަދެއްގެ ރައްޔިތުންނާއި، އިދިކޮޅު ފަރާތްތަކުގެ އިތުރުންވެސް އަމިއްލަ ޕާޓީންވެސް އެކަމަށް ފިއްތުންތައް ކުރިމަތިވުމެވެ.  އަސްކަރީ ވެރިކަމެއް ހިންގެވުމަށް ނިންމެވި މައިގަނޑު ސަބަބެއްކަމަށް ރައީސް ޔޫން ވިދާޅުވެފައިވަނީ، އިދިކޮޅު ބައެއް ފަރާތްތަކާއި އުތުރުކޮރެއާ ގުޅިގެން ސަރުކާރާ ދެކޮޅަށް ކަންތައްތަކެއް ހިންގަން އުޅޭކަމެވެ. 

މިކަމާ ގުޅިގެން އިދިކޮޅު ފަރާތްތަކުން ވަނީ އެއީ ހަގީގަތުގެ މައްޗަށް އެކުލެވިގެންވާ ވާހަކަތަކެއް ނޫންކަމަށް ބުނެފައެވެ. ދެކުނު ކޮރެއާގެ ރައީސް ޔޫންގެ އަމުރުފުޅަށް ރޭ ހިނގާދިޔަ ކަންތައްތަކާ ގުޅިގެން އެޤައުމުގެ ނޫސްތަކުން މިއަދު ވަނީ ވަރަށްބޮޑަށް ފާޑުކިޔާފައެވެ. ނޫސްތަކުގެ ފަލަ ސުރުހީތަކުގައި ލިޔެފައިވަނީ، ރައީސް ޔޫން ވަނީ ރައްޔިތުންނާއި ދައުލަތަށް ހަމަ ރަނގަޅަށްވެސް ހިޔާނާތްތެރިވެފައި ކަމަށެވެ. ރޭ ހިންގި ކަންކަން ތަހުގީގު ކުރަން ޖެހޭކަން ފާހަގަކުރަމުން އިދިކޮޅު ފަރާތްތަކާއި ގާނޫނު ހަދާ މަޖިލީހުގެ ބައެއް މެމްބަރުން ވަނީ މަޖިލީޙުގެ ތެރެއިން ޔޫން މަގާމުން ދުރުކުރަންޖެހޭކަމަށް ގޮވާލާފައެވެ.

"ޔޫން މަގާމުގެ ޒިއްމާ އަދާކުރައްވާކަށް ކުފޫ ހަމައެއް ނުވޭ. މަޖިލީހުގެ ތެރެއިން ރައީސް ޔޫންގެ ކޮނޑުފުޅުން ރައީސުލްޖުމްހޫރިއްޔާގެ ޒިއްމާތައް ނަގަންޖެހޭ" ބައެއް ނޫސްތަކުގެ އެޑްޓޯރިއަލް ލިޔުންތަކުގައި ބުނެފައިވެއެވެ.

އިދިކޮޅު އިސް ފަރާތްތަކުންވެސް ވަނީ ޔޫން މަގާމުން ދުރުކުރުމަށް އެންމެން އެކައްޗެއް ކިޔައިގެން މަސައްކަތްކުރަންޖެހޭކަމަށް ބުނެފައެވެ.