ސްރީލަންކަން އިން އައްޑޫސިޓީ ގަމަށް ކުރާ ދަތުރުތައް އިތުރުކުރުމަށް ނިންމައިފިއެވެ.

މިކަމާ ގުޅޭގޮތުން ސްރީލަންކަން އެއާލައިންސްގެ ރާއްޖޭގެ އެޖެންޓް، އޭސް އޭވިއޭޝަންގެ މެނޭޖިންގ ޑިރެކްޓަރ މުޙައްމަދު ފިރާޤް ވޮއިސްއަށް މައުލޫމާތު ދެއްވަމުން ވިދާޅުވީ، އެ އެއާލައިނުން އައްޑޫސިޓީ ގަމަށް މިހާރު ކުރަމުން އަންނަ ޝެޑިއުލް ދަތުރުތައް މިމަހުގެ 19 ވަނަ ދުވަހުން ފެށިގެން އިތުރުކުރުމަށް ނިންމާފައިވާކަމަށެވެ. ސްރީލަންކަން އިން މިހާރު އައްޑޫސިޓީ ގަމަށް ހަފްތާއަކު ދެ ފްލައިޓް ބާއްވައެވެ.

ފިރާގް ވިދާޅުވީ ޑިސެމްބަރު 19 ވަނަ ދުވަހުން ފެށިގެން ތިން ފްލައިޓް ގަމަށް ދަތުރުކުރުމަށް ނިންމާފައިވާއިރު، އެ ދަތުރުތައް ކުރިއަށްދާނީ ބްރާސްފަތި، ހޮނިހިރު އަދި އަންގާރަދުވަހު ކަމަށެވެ. ސްރީލަންކަން އިން ގަމަށް ކުރާ ދަތުރުތައް އިތުރުކުރުމުގެ މައިގަނޑު ބޭނުމަކީ ދުނިޔޭގެ އެކި ކަންކޮޅުތަކުން އައްޑޫސިޓީއަށް ދަތުރުކުރަން ބޭނުންވާ ދަތުރުވެރިންނަށް އެ ފުރުސަތު ފަހިކޮށްދިނުމެވެ.

Advertisement

ސްރީލަންކަންއަކީ މެދުކެނޑުމެއްނެތި އައްޑޫސިޓީއަށް އުދުހުންތައް ބާއްވަމުން އަންނަ އެންމެ ގިނަދުވަސްވީ ބައިނަލްއަޤްވާމީ އެއާލައިނެވެ. ކޮވިޑަށްފަހު ސްރީލަންކަންއިން އައްޑޫސިޓީ ގަމަށް ކުރާ ދަތުރުތައް ހަފްތާއަކު އެއް ފްލައިޓަށް މަދުވިއެވެ. ސްރީލަންކަން އަކީ ރާއްޖެއަށް އުދުހުންތައް ބާއްވާތާ އެންމެ ގިނަދުވަސްވީ އެއާލައިނެވެ. 

ކުރިއަށްއޮތީ ރާއްޖޭގެ ފަތުރުވެރިކަމުގެ ހައި ސީޒަންކަމުން، ރާއްޖޭގެ އެކި ސަރަހައްދުތަކަށް އަންނަ ފްލައިޓުގެ އަދަދު އިތުރުވާނޭކަމަށް ޓޫރިޒަމް މިނިސްޓްރީން ބުނެއެވެ.