ރާއްޖޭގެ ކަނޑުގެ ސަރަހައްދުން މުޅިން އާ ވައްތަރެއްގެ މަހެއް ފެނިފައިވާކަމަށް ސައިންސްވެރިން ހާމަކޮށްފިއެވެ. މި މަހުގެ ހަށިގަނޑުގެ ކުލައަކީ ޕާރލް ވައިޓެވެ.

މި ހޯދުން ހާމަކޮށްފައިވަނީ ރިސާޗް ގޭޓްގައި ޝާއިޢުކޮށްފައިވާ ދިރާސީ މައުލޫމާތުގައެވެ. 

ނިލަމެހި އާއިލާއަށް ނިސްބަތްވާ މި މަސް ރާއްޖޭގެ ކަނޑުގެ އަޑިން ދެނެގަތީ މެރިން ސައިންސްގެ ޓީމަކުންނެވެ. މި ޓީމުގައި ކެލިފޯނިއާ އެކަޑަމީ އޮފް ސައިންސަސް، ސާއޯ ޕާއުލޯ ޔުނިވަރސިޓީ އަދި މޯލްޑިވްސް މެރިން ރިސާޗް އިންސްޓިޓިއުޓްގެ މެންބަރުން ހިމެނެއެވެ. މި ޓީމުގައި އިސްވެ ހަރަކާތްތެރިވެފައިވަނީ ލުއިޒް އޭ ރޯޗާ އެވެ.

މި އާ ވައްތަރުގެ މަހަށް ދީފައިވަނީ ދިވެހި ނަމެކެވެ. އެއީ "ކްރޯމިސް އަބަދަށް" މި ނަމެވެ. މި ނަމުގައި ކްރޯމިސް އަކީ މި މަހުގެ އާއިލީ ނަމެވެ. ދިވެހި ބަހެއް ކަމަށް "އަބަދަށް" މި މަހުގެ ނަމުގައި ހިމަނާފައިވަނީ މި މަސް ހޯދުމަށް ކުރެވުނު ދަތުރަށް ފައިސާ ދިން ރޯލެކްސް ޕަރޕެޗުއަލް ޕްލެނެޓް އިނީޝިއޭޓިވްގެ ޝަރަފުގައެވެ.

މި މަސް ފުރަތަމަ ފެނުނީ ޅ. އަތޮޅުގެ ކަނޑުގެ އަޑިންނެވެ. އެ އަތޮޅުން ފެނުނު މަހުގެ ދިގުމިނަކީ 2.7 އިންޗިއެވެ. މި މަސް ހިފީ ކަނޑުގެ އަޑިން 101 މީޓަރު ފުންމިނުންނެވެ.

ޅ.އަތޮޅުން ފެށިގެން ދ. އަތޮޅާ ހަމައަށް 8 ތަނަކުން މި މަސް ފެނިފައިވެއެވެ. އަދި މި މަސް ރާއްޖޭގެ ގިނަ ސަރަހައްދުތަކުން ފެންނާނެ ކަމަށް ގަބޫލުކުރެވެއެވެ.

މި މަސް ދެނެގަތް ޓީމުގެ ތެރޭގައި ދިވެހި ބަޔޮލޮޖިސްޓް އަހްމަދު ނަޖީބުގެ ނަންވެސް ރިސާޗްގޭޓްގެ އެ ދިރާސާ ރިޕޯޓްގައި ހިމަނާފައިވެއެވެ.