މޯލްޑިވްސް ރިޓަޔަމަންޓް ޕެންޝަން ސްކީމް ފަންޑަށް އެންމެގިނައިން ފައިސާ ޖަމާކުރަނީ، ފިރިހެނުންކަމަށް ޕެންޝަން އޮފީހުގެ ތަފާސްހިސާބުތަކުން ދައްކައިފިއެވެ.

ރިޓަޔަމަންޓް ޕެންޝަން ސްކީމްގެ ތަފާސްހިސާބަށް ބަލާއިރު، ފަންޑަށް އެންމެގިނައިން ކޮންޓްރިބިއުޓްކުރާ ބައެއްގެ ގޮތުގައި ފިރިހެނުން ހިމެނޭއިރު، މިއަހަރުގެ މިހާތަނަށް ޕެންޝަން ފަންޑަށް ފައިސާ ޖަމާކުރި ފިރިހެން މުއައްޒަފުންގެ އަދަދު އުޅެނީ 84,794 ގައެވެ. އަދި ފަންޑަށް ފައިސާ ޖަމާކުރާ އަންހެން މުއައްޒަފުންގެ އަދަދު އުޅެނީ 49،764 ގައެވެ. އަހަރުގެ މިއަހަރުގެ މިހާތަނަށް ޕެންޝަން ފަންޑަށް ފިރިހެން މުއައްޒަފުން ކޮންޓްރިބިއުޓްކުރި ފައިސާގެ އަދަދު އުޅެނީ 1.04 ބިލިއަން ރުފިޔާ ގައެވެ. އަންހެން މުއައްޒަފުން ޖަމާކުރި އަދަދު އުޅެނީ 498.2 މިލިއަން ރުފިޔާގައެވެ.

ޕެންޝަން ފަންޑަށް ފައިސާ ޖަމާކުރާ މުއައްޒަފުންގެ އަދަދު 127,000 ގައި އުޅޭއިރު، މީގެ ތެރެއިން 47،094 މުއައްޒަފުންނަކީ އަމިއްލަ ކުންފުނިތަކުގެ މުއައްޒަފުންނެވެ. އަމިއްލަ ކުންފުނިތަކުން ފެންޝަން ފަންޑަށް ޖަމާކުރާ އަންހެން މުއައްޒަފުންގެ އަދަދަކީ 12,034 އެވެ. އަދި ފިރިހެން މުއައްޒަފުންގެ އަދަދަކީ 35,060 އެވެ.

ފަންޑަށް ފައިސާ ޖަމާކުރާ ސަރުކާރު މުއައްޒަފުންގެ އަދަދު 51،393 އުޅޭއިރު، މީގެ ތެރެއިން 27,189 މުއައްޒަފުންނަކީ އަންހެނުންނެވެ. އަދި ފިރިހެން މުއައްޒަފުންގެ އަދަދަކީ 24,204 އެވެ.

އެސްއޯތަކަށް ނިސްބަތްވާ މުއައްޒަފުންގެ އަދަދު 31،861 ގައި އުޅޭއިރު، އޭގެ ތެރޭގައި އަންހެން މުއައްޒަފުންގެ އަދަދަކީ 8,239 އެވެ އަދި ފިރިހެން މުއައްޒަފުންގެ އަދަދު އުޅެނީ 23,622 ގައެވެ.

މޯލްޑިވްސް ޕެންޝަން އޮފީހުގެ ތަފާސްހިސާބުތަކަށް ބަލާއިރު، މޯލްޑިވްސް ރިޓަޔަމަންޓް ޕެންޝަން ސްކީމްގެ މެމްބަރުންގެ އަދަދު މިހާރު 190,458 އަރައެވެ. އޭގެ ތެރެއިން ފަންޑަށް ފައިސާ ޖަމާކުރަމުންދާ ފަރާތްތަކުގެ އަދަދަކީ 181,901 އެވެ. ޕެންޝަން އޮފީހުން ލިބެންހުރި މައުލޫމާތަށް ބަލާއިރު، މިހާތަނަށް ފަންޑުގެ ޖުމްލަ އަދަދު 24.3 ބިލިއަން ރުފިޔާއަށް އަރާއިރު، މެމްބަރުންގެ ފަރާތުން ފަންޑަށް ޖަމާކުރި އަދަދު އުޅެނީ 15.2 ބިލިއަން ރުފިޔާގައެވެ. އެހެންކަމުން ފަންޑަށް އިތުރުވި 9.1 ބިލިއަން ރުފިޔާއަކީ ފަންޑުން ކުރި އިންވެސްޓްމަންޓްތަކުން މިހާތަނަށް ލިބުނު ފައިދާއެވެ.

މޯލްޑިވްސް ރިޓަޔަރމަންޓް ޕެންޝަން ސްކީމަކީ ވަޒީފާދޭ ފަރާތާއި ވަޒީފާ އަދާކުރާ ފަރާތުން ކަނޑައެޅިފައިވާ ވަކި އަދަދަކަށް ސްކީމަށް ފައިސާ ދައްކައި، އެ ފައިސާ އިންވެސްޓް ކޮށްގެން ރިޓަޔަރމަންޓަށް ފައިސާ ރައްކާކުރެވޭ ޕެންޝަން ނިޒާމެކެވެ. މި ފަންޑަށް ވަޒީފާދޭ ފަރާތުންނާއި ވަޒީފާއަދާކުރާ ފަރާތުން ޕެންޝަން ކޮންޓްރިބިއުޝަންގެ ގޮތުގައި ކޮންމެ މަހަކު މުވައްޒަފުގެ އަސާސީ މުސާރައިގެ %7 ޖަމާކުރެއެވެ.