މުސާރަނުދޭތީކަމަށް ބުނެ، މިއަދު މުލިއާގޭ ކައިރިއަށް އެއްވި ބިދޭސީންގެ ތެރެއިން ބައެއް މީހުން އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އެއްވި ބިދޭސީން ފުރަތަމަ އެއްވީ މުލިއާގޭ ކައިރިއަށެވެ. މުލިއާގޭ ކައިރިއަށް އެއްވުމުން ފުލުހުން ވަނީ އެމީހުން މަޖީދިއްޔާ ސްކޫލް ކައިރިއަށް ގެންގޮސްފައެވެ. ފަހުން އެސަރަހައްދުގައި މުޒާހަރާކޮށް އެތަނުން ދިއުމަށް އެދުނު ނަމަވެސް އެކަން އެގޮތަށް ނުކުރުމުން ފުލުހުން ވަނީ ވެހިކަލެއްގައި އެމީހުން އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.
ބައެއް މީޑިއާތަކަށް މައުލޫމާތު ހިއްސާކުރަމުން ފުލުހުން ބުނީ، އިމިގްރޭޝަނުގެ ބެލުމުގެ ދަށަށް 55 ބިދޭސީއަކު ގެންގޮސްފައިވާކަމަށެވެ. އޭގެ ތެރޭގައި ހިމެނެނީ ބަންގާޅަށް ނިސްބަތްވާ 17 މީހަކާއި އިންޑިއާއަށް ނިސްބަތްވާ 38 މީހެކެވެ.
މުޒާހަރާކުރަން ނިކުތް މީހުންނަކީ ކޮން ކުންފުނިތަކަކަށް ނިސްބަތްވާ ބައެއްކަމެއް އަދި ސާފެއް ނުވެއެވެ. ރާއްޖޭގައި މަސައްކަތް ކުރާ ބިދޭސީންނަށް އުޖޫރަ ނުދިނުމުގެ މައްސަލަ ވަރަށް ބޮޑެވެ. އަދި މުސާރަ ނުދީގެން ބިދޭސީން މަގުތަކަށް އަޑުއުފުލަން ނިކުތުމަކީ އާއްމުކޮށް ފެންނަ މަންޒަރެކެވެ.
Advertisement
This content is created and paid for by advertisers and does not involve Voice Journalists
