އެއަރބަސް ކުންފުނިން 100 މަތިންދާބޯޓު ގަތުމަށް އެއަރ އިންޑިއާ ކުންފުނިން އޯޑަރު ދީފިއެވެ.

ޓާޓާ ކުންފުނީގެ ދަށުން ހިންގާ އެއަރ އިންޑިއާއިން އޯޑަރު ދީފައިވަނީ އޭ-350 މަރުކާގެ 10 ބޯޓާއި އޭ-320 މަރުކާގެ 90 ބޯޓު ގަތުމަށެވެ. މިއީ މިދިޔަ އަހަރު އެކުންފުނިން އެއަރބަސް ކުންފުންޏާއި ބޮއިންގ ކުންފުންޏަށް އޯޑަރު ދިން 470 މަތިންދާބޯޓުގެ އިތުރަށް އެކުންފުނިން އަލަށް އޯޑަރު ކުރި މަތިންދާބޯޓުތަކެކެވެ. މި މަތިންދާބޯޓުތައް ގަތުމަށް އެއަރ އިންޑިއާ ކުންފުނިން ހޭދަކުރަންޖެހޭ އަދަދު 70 ބިލިއަން އެމެރިކާ ޑޮލަރަށް އަރައެވެ. އައު 100 މަތިންދާބޯޓުގެ އޯޑަރާއެކު ޔޫރަޕްގެ އެއަރބަސް ކުންފުނީގައި މިހާރު އެއަރ އިންޑިއާގެ 350 އޯޑަރު އެބައޮތެވެ.

2022 ވަނަ އަހަރު، މާލީ ގޮތުން ގެއްލުން ވަމުން ދަނިކޮށް އެއަރއިންޑިއާގެ ކޮންޓްރޯލް އަލުން ނެގުމަށްފަހު ޓާޓާ ކުންފުނިން ގެންދަނީ އެ އެއަރލައިންއަކީ ފައިދާވާ ކުންފުންޏަށް ހެދުމަށް މަސައްކަތްކުރަމުންނެވެ. އެގޮތުން އައު މަތިންދާބޯޓުތައް ގެނެސް، އައު ރޫޓުތަކުން ދަތުރުކުރުމަށް މަސައްކަތްކުރަމުންދާއިރު، ބައުވެފައިވާ މަތިންދާބޯޓުތައް އައުކުރުމަށްވެސް ދަނީ މަސައްކަތްކުރަމުންނެވެ. އެހާ ގިނަ އަދަދެއްގެ މަތިންދާބޯޓަށް އެކުންފުނިން އޯޑަރުކުރި ސަބަބަކީ އެއީއެވެ.

Advertisement