ކުރިއަށް އޮތް 10 އަހަރުތެރޭ އިންޑިއާގައި އުފެދޭ ބިލިއަނަރުން ބޮޑުތަނުން އިތުރުވެގެން ދާނެކަމަށް ސްވިޓްޒަލެންޑްގެ އެންމެ ބޮޑު އެއް ބެންކް ޔޫ.ބީ.އެސް އިން އަންދާޒާކޮށްފިއެވެ.

ބައިނަލްއަގްވާމީ އެންމެ ބޮޑެތި ބޭންކުތަކުގެ ތެރޭގައި ހިމެނޭ ޔޫ.ބީ.އެސް އިން ނެރުނު ރިޕޯޓެއްގައި ބުނީ ޗައިނާގައި 2020 ވަނަ އަހަރުގެ ކުރިން އައި އަހަރުތަކުގައި ކުއްލިއަކަށް ބިލިއަނަރުންތަކެއް އުފެދިގެން ދިޔަ ގޮތަށް އިންޑިއާގައިވެސް ބިލިއަނަރުން އުފެދިގެންދާނެ ކަމަށެވެ. މިދިޔަ ދިހަ އަހަރުގެ ތެރޭގައިވެސް އިންޑިއާގައި އުފެދުނު ބިލިއަނަރުންގެ އަދަދު އޭގެ ކުރީ އަހަރުތަކަ އަޅާ ބަލާއިރު 2 ގުނައަށްވުރެ އިތުރުވިކަންވެސް އެ ރިޕޯޓުގައި ފާހަގަކޮށްފައިވެއެވެ. އިންޑިއާގެ ބިލިއަނަރުންގެ މިލްކިއްޔާތު މިހާރު 900 ބިލިއަން އެމެރިކާ ޑޮލަރު ފަހަނައަޅައި ގޮސްފިއެވެ.

އަދި ހަމައެއާއެކު، އިންޑިއާގެ ހިއްސާގެ ބާޒާރުވެސް ވަރަށް ބޮޑަށް ރަނގަޅުވެ، އޭގެ ސަބަބުން ބޮޑެތި މަހުޖަނުންތަކެއް އުފެދި، ވިޔަފާރިތައް އެތައް ތަނަކުން ފުޅާ ވެފައިވާކަންވެސް އެ ރިޕޯޓުގައި ވަނީ ފާހަގަކޮށްފައެވެ. މީގެ ތެރޭގައި އިންޑިއާގައި ޒަމާނުއްސުރެ ހިންގަމުން އަންނަ އާއިލީ ބޮޑެތި ވިޔަފާރިތައްވެސް ހިމެނެއެވެ.

Advertisement