މާލެއަށް ކުރި ވިއްސާރާގައި 5 ގެއަކުން މީހުން ބަދަލުކުރަން ޖެހުނުކަމަށް ނެޝަނަލް ޑިޒާސްޓަރ މެނޭޖްމެންޓް އޮތޯރިޓީ، އެންޑީއެމްއޭއިން ބުނެފިއެވެ.

ދައުލަތުގެ މީޑިއާގައި ވާހަކަދައްކަމުން އެންޑީއެމްއޭގެ ޗީފް އެގްޒެކެޓިވް ޙިސާން ޙަސަން ވިދާޅުވީ މިހާރު ކުރަމުންދާ މޫސުމީ ވިއްސާރައިގެ ސަބަބުން މިދިޔަ 24 ގަޑިއިރުގެ ތެރޭގައި މާލެސިޓީއަށް ކުރި ވިއްސާރައިގަ ގެތަކަށް ފެންވަދެ، 5 ގެއަކުން މީހުން ބަދަލުކުރަން ޖެހުނު ކަމަށެވެ. އެމީހުން ބަދަލުކުރުމުގެ މަސައްކަތް ކުރިއަށްދިޔައީ ރެޑްކްރޮސަންޓާއި ޑިޒާސްޓާ ގުޅިގެންނެވެ. ޙިސާން ވިދާޅުވީ މަގުތަކުގައި ފެންބޮޑުވުމުގެ ސަބަބުން ގެތަކަށް ފެން ވަންނަމުންދިއުމާ ގުޅިގެން ގިނަ ގޭތަކަކުން ވެލިބަސްތާ ޖަހަން ޖެހުނު ކަމަށެވެ.

މިގޮތުން ވެލިބަސްތާ ޖެހުމަށް މާލެސިޓީ ކައުންސިލަށް 5،000 ހާހަށްވުރެ ގިނަ ވެލިބަސްތާ ޖެހުމަށް ދޫކުރެވުނުކަން އޭނާ ފާހަގަކުރެއްވިއެވެ. ގެތަކަށާއި ފިހާރަތަކަށް ފެން ވަންނަމުންދިއުމާ ގުޅިގެން ވެލިބަސްތާ ޖެހުމުގެ މަސައްކަތް ކުރިއަށް ގެންދިޔައީ އެމްއެންޑީއެފާއި ރައްޔިތުންނާ ކަމާގުޅޭ މުއައްސަސާތައް ގުޅިގެންނެވެ.

ރާއްޖެއަށް މިހާރު ކުރަމުންދާ މޫސުމީ ވިއްސާރާގައި މިހާތަނަށް އެންމެގިނައިން ވާރޭ ވެހުނީ މާލެއަށެވެ.

މޯލްޑިވްސް މީޓިއޮލޮޖިކަލް ސެންޓަރުން އާއްމުކުރި މައުލޫމާތުތަކަށް ބަލާއިރު، މިހާރު ކުރަމުންދާ މޫސުމީ ވިއްސާރާގައި މާލެއަށް ވަނީ 136.5 މިލިލީޓަރުގެ ވާރޭ ވެހިފައެވެ. ދެން އެންމެ ގިނައިން ވާރޭ ވެހުނީ ހުޅުމާލެ އަދި ހުޅުލެއަށެވެ. އަތޮޅުތެރޭގެ ރަށްތަކަށް ބަލާއިރު، ދަރަވަންދޫ ގާފަރު އަދި ތޮއްޑޫއަށްވެސް ވަނީ ރެކޯޑް އަދަދަކަށް ވާރޭ ވެހިފައެވެ.