ކުރިއަށްއޮތީ ރާއްޖެއަށް މޫސުން ގޯސް ދުވަސްތަކެއްކަމަށް ލަފާކުރެވޭތީވެ، ރައްކާތެރިވެގެން ތިބުމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން އިލްތިމާސްކޮށްފިއެވެ.
އެންޑީއެމްއޭއިން ބުނީ، ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި އެ ކޮޅިގަނޑާއި ގުޅިފައިވާ ލޯޕްރެޝަރ ޓްރަފްގެ ސަބަބުން ޖެނުއަރީމަހުގެ އެއްވަނަ ދުވަހުން ފެށިގެން 5 ވަނަ ދުވަހުގެ ނިޔަލަށް ރާއްޖޭގެ ބޮޑުބަޔަކަށް ގުރުމާއެކު ބޯކޮށް ވާރޭވެހި، ވަޔާއި ކަނޑުތައް ގަދަވެ އަދި ބައެއް އަތޮޅޫތަކަށް އުދައެރުމުގެ ފުރުސަތު އޮންކަމަށް މޫސުމާބެހޭ ޤައުމީ އިދާރާއިން ލަފާކޮށްފައިވާކަމަށެވެ. އެހެންކަމުން މޫސުން ގޯސްވުމުގެ ސަބަބުން ލިބިދާނެ ގެއްލުންތަކުން ރައްކާތެރިވުމަށް ދުރާލާ މަސައްކަތްކުރުމަށް ޑިޒާސްޓާއިން ވަނީ އިލްތިމާސްކޮށްފައެވެ.
މޫސުން ގޯސްވުމުގެ ސަބަބުން ލިބިދާނޭ ގެއްލުންތަކުން ކުޑަކުރުމަށް ސަމާލުކަންދެންވީ ކަންތައްތައް:
- ވާރޭވެހި ފެންބޮޑުވެދާނެތީވެ، ގޭގެއަށް ފެން ނުވަންނާނެހެން ވެލި ބަސްތާތައް ޖެއްސުން
- ވާރޭވެހުމުގެ ސަބަބުން ފެންބޮޑުވެދާނެތީ ގެއްލުން ލިބޭ ހިސާބުގައި ބަހައްޓާފައި ހުންނަ ހިފާގެންގުޅޭ ސާމާނު ފެން ނުޖެހޭ ފަދަ އުސްތަންތަނުގައި ބެހެއްޓުން
- ވައިގަދަވެ ފުރާޅު އެއްލާލަފާނެކަމަށް ލަފާކުރެވޭނަމަ، ކުރިއަލާ ވައު ފަދަ އެއްޗެއް ބޭނުންކޮށްގެން ހައްޔަރުކުރުން
- ބޭނުން ނުކުރާނަމަ، ކަރަންޓުން ބޭނުންކުރާ ތަކެތި ނިންވާލާފައި ބެހެއްޓުން
- ކަނޑުދަތުރުފަތުރު ކުރުމުގެ ކުރިން މޫސުމަށް ރައްކާތެރިވެ، މައުލޫމާތުހޯދުން. އަިދ މުއާސަލާތީ ނިޒާމް ހުރިކަން ޔަގީންކުރުން
- ކާޑުގެ ބާވަތްތަކާއިު ޒަރޫރީ ތަކެއްޗަށް ދަތިނުވާނޭހެން ދުރާލާ ކަންކަން އިންތިޒާމުކުރުން
މިދުވަސްވަރަކީ މޫސުން ގޯސް ދުވަސްވަރަކަށްވުމުން މެޓް އޮފީހުންވެސް ވަނީ އެ އިދާރާއިން ނެރޭ މޫސުމާ ބެހޭ މައުލޫމާތުތަކަށް އިޖާބަދިނުމަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
