ކ.އަތޮޅު ގުޅިއަށް ކުރެއްވި ޒިޔާރަތަށްފަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިރޭ މާލެ ވަޑައިގެންފިއެވެ.

ރައީސް ޑރ.މުއިއްޒު ގުޅިއަށް ވަޑައިގެންނެވީ މިއަދު މެންދުރުފަހުގެ ވަގުތެއްގައެވެ. ރައީސް ޑރ.މުއިއްޒު ވަނީ ގުޅިއަށް ވަޑައިގެން ރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކޮށް، ރަށުގެ ތަރައްޤީއާ ގުޅޭގޮތުން މަޝްވަރާކުރައްވާފައެވެ. މި ބައްދަލުކުރެއްވުންތަކުގައި ރައީސް ވަނީ ގުޅީގެ ރައްޔިތުން އެދިލައްވާ ކަންކަން އޮޅުންފިލުއްވާފައެވެ.

ގުޅިއަށް ވަޑައިގެން އެރަށުގެ ރައްޔިތުންނާ ބައްދަލުކޮށްލެއްވުމަށް މިއަދު  ހަވީރު އެރަށުގައި ބޭއްވި ޖަލްސާގައި ރައީސް ޑރ.މުއިއްޒު ވަނީ ވަނީ ގުޅީގެ ރައްޔިތުންނަށް އުއްމީދީ ވާހަކަތަކެއް ދައްކަވާފައެވެ. ރައީސް ވިދާޅުވީ، ގުޅީގެ ރައްޔިތުންގެ ކަންބޮޑުވުންތަކަށް ހައްލެއް ގެނައުމަށް ސަރުކާރުގެ ތެރެއިން ކަންކަން މަގުފަހިކޮށްދެއްވާނޭކަމަށެވެ. މިގޮތުން ލޯކަލް ޓޫރިޒަމަށް ދޫކޮށްފައިހުރި ބިންތަކުގެ ނަފާ ރައްޔިތުންނަށް ހޯދައިދިނުމަށް މަގުފަހިކުރައްވާނޭކަމަށް ރައީސް ވިދާޅުވިއެވެ.

Advertisement

މީގެއިތުރުން ގުޅީގެ ބަނދަރުގެ މައްސަލައާއި ބިންހިއްކުމުގެ މަސައްކަތް ކުރިއަށް ގެންގޮސްދެއްވާނޭކަމަށް ރައީސް ވިދާޅުވިއެވެ. ގުޅީގެ ބިން ހިއްކުމުގެ މަސައްކަތް ނިމިގެންދިޔަ ސަރުކާރުން ބަޔަކާ ހަވާލުކުރިނަމަވެސް އަދިވެސް އެ މަޝްރޫޢުގެ މަސައްކަތް ފެށިފައެއް ނުވެއެވެ. މިކަމާ ގުޅޭގޮތުން ރައީސ ްވިދާޅުވީ، ނިމިގެންދިޔަ އަހަރު ގުޅީގެ ބިން ހިއްކުމުގެ މަސައްކަތް ކުރިއަށްނުގެންދެވުނީ، އެ މަޝްރޫޢުއަށް ބޭނުންވާ ފައިސާ ބަޖެޓްކޮށްފައި ނެތުމުންކަމަށެވެ.

މީގެ އިތުރުންވެސް ރައީސް ވިދާޅުވީ ގުޅީ ސިއްހީމަރުކަޒުގެ ވަސީލަތްތައް ތަރައްޤީކުރުމާއި، ތައުލީމީ ދާއިރާ ކުރިއެރުމުގައި ދިމާވެފައިވާ މައްސަލަތަކަށް ހައްލު ހޯއްދަވައިދެއްވާނޭކަމަށެވެ.