ކެނެޑާގެ ބޮޑުވަޒީރު އަދި ލިބަރަލް ޕާޓީގެލީޑަރު ޖަސްޓިން ޓްރޫޑޯ މަގާމުން އިސްތިއުފާދެއްވުމަށް ނިންމަވައިފިއެވެ.
މީގެ ކުޑައިރުކޮޅެއްކުރިން މީޑިއާއަށްދެއްވި ބަސްދީގަތުމެއްގައި ޓްރޫޑޯ ވަނީ އިސްތިއުފާ ދެއްވުމަށް ނިންމަވާފައިވާކަން އާއްމުކޮށް ހާމަކޮށްފައެވެ. ޓްރޫޑޯ ވިދާޅުވީ، ލިބަރަލް ޕާޓީގެ ލީޑަރުކަމުގެ މަގާމުންނާއި ބޮޑުވަޒީރުކަމުންވެސް އިސްތިއުފާޑެއްވުމަށް ނިންމާފައިވާކަމަށެވެ. މި ނިންމުން ނިންމެވީ އާއިލާއާވެސް މަޝްވަރާކުރުމަށްފަހު ޤައުމަށްވެސް އެންމެ ރަނގަޅުގޮތަކީ އެއީކަމަށް ފެންނާތީކަމަށް ޓްރޫޑޯ ވިދާޅުވިއެވެ.
ޓްރޫޑޯ މަގާމުން އިސްތިއުފާދެއްވުމަށް ނިންމެވި ނަމަވެސް އިސްތިއުފާދެއްވާނީ، ޕާޓީއަށް އައު ލީޑަރަކު އައްޔަނުކުރެވުމުންކަމަށް ޓްރޫޑޯ ވިދާޅުވިއެވެ. ޓްރޫޑޯ އިސްތިއުފާދެއްވުމަށް ނިންމެވިކަން ވަނީ އޭނާގެ ޕާތީގެ އިސްފަރާތްތަކާވެސް ހިއްސާކޮށްފައެވެ. ކެނެޑާގެ ބައެއް ނޫސްތަކުން ރިޕޯޓްކުރާ ގޮތުގައި ޓްރޫޑޯގެ ލީޑަރޝިޕްގެ ދަށުން ލޭބަރ ޕާޓީވަނީ ވަރަށްބޮޑަށް ބައިބައިވެފައެވެ. މީގެ މައިގަނޑު ސަބަބަކީ ޓްރޫޑޯގެ ޒާތީ މަސްލަހަތު އިސްކުރައްވައިގެން ކަންކަން ކުރިއަށްގެންދެވުންކަމަށް ސިޔާސީ ބައެއް ފަރާތްތަކުން ބުނެއެވެ.
އުމުރުފުޅުން 53 އަހަރުގެ ޓްރޫޑޯ ގެންދަވަނީ 2015 ވަނަ އަހަރުން ފެށިގެން ކެނެޑާގެ ބޮޑުވަޒީރުކަން އަދާކުރައްވަމުންނެވެ. ޓްރޫޑޯ ކަންކަން ކުރައްވާ ގޮތާމެދު ހިތްހަމަ ނުޖެހިގެން މިފަހުން ފިނޭންސް މިނިސްޓަރުވެސް ވަނީ އިސްތިއުފާދެއްވާފައެވެ.
Advertisement
This content is created and paid for by advertisers and does not involve Voice Journalists
