ގދ.ހޯނޑެއްދޫ ކޯލްޑް ސްޓޯރޭޖް މަޝްރޫއުގެ މަސައްކަތް ފައިދާހުރި ގޮތަކަށް ކުރިއަށްދާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވައިފިއެވެ.
ހުވަދުއަތޮޅަށް ރައީސް ޑރ.މުޢިއްޒު ކުރައްވަމުން ގެންދަވާ ދަތުރުފުޅުގެ ތެރެއިން ހޯނޑެއްދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި، ވާހަކަފުޅު ދައްކަވަމުން އެމަނިކުފާނު ވިދާޅުވީ، މަސް ޕްލާންޓް ނުވަތަ ކޯލްސް ސްޓޯރޭޖް މަޝްރޫއަށް އެރަށުގެ ވަރަށް ބޮޑު ބައެއް އަމިއްލަ ކުންފުންޏަކަށް ދީފައިވާކަމަށެވެ.
އެކަމަށް ވަރަށް ގިނަ ދުވަސްވެފައިވި ނަމަވެސް އެމަޝްރޫއު އަދިވެސް ނުނިމޭކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، އެންމެ ފުރިހަމަކަމަކަށްވާނީ އެމަޝްރޫއު ނިމި، އޭގެ ފައިދާ މަސްވެރިކަމަށް ލިބިގެންދިޔުންކަމަށާއި، އެ ބިމުން ރަށަށް ރަނގަޅު ފައިދާއެއްވާން ޖެހޭނެކަމަށެވެ.
ރައީސް ޑރ.މުޢިއްޒު ވިދާޅުވީ ހެދިފައިވާ އެއްބަސްވުމުގެ ދަށުން މި މައްސަލައަށް ދާއިމީ ހައްލެއް އަންނަން ޖެހޭނެކަމަށް ގަބޫލުފުޅު ކުރައްވާކަމަށާއި، ކައުންސިލަށް އެ ބިމުން އެކަށީގެންވާގޮތަށް އާމްދަނީ ނުލިބޭކަމަށެވެ.
"ދެންމެގައި ކައުންސިލް ރައީސް އެ ފާހަގަކުރެއްވި ގޮތަށް އަޅުގަނޑު ޔަގީންކަން ދިނިން އިރާދަކުރެއްވިއްޔާ ކައުންސިލަށް، އަދި އޭގެ ނަތީޖާ އަކީ ރައްޔިތުންނަށް އެބިމުން އެންމެ ރަނގަޅު ނަފާއެއް، ނޫނިއްޔާ އާމްދަނީ ލިބޭނެ ގޮތް ހަދައިދޭނެކަމަށް،"
ރައީސް ޑރ.މުޢިއްޒު ވިދާޅުވިއެވެ.
އެންމެ ރަނގަޅު ނަތީޖާއަކަށްވާނީ އެމަޝްރޫއަށް ދާއިމީ ހައްލެއް އައުންކަމަށް ވިދާޅުވެ ރައީސް ޑރ.މުޢިއްޒު ވަނީ އެ މަޝްރޫއު އެގޮތަށް ކުރިއަށް ގެންދާނެކަމަށާއި، ރައްޔިތުންނަށް އެންމެ ފައިދާހުރިގޮތަކަށް އެކަން ހަމަޖައްސަވާނެކަމުގެ ޔަގީންކަން ދެއްވާފައެވެ.
Advertisement
This content is created and paid for by advertisers and does not involve Voice Journalists
