ގދ. ހޯނޑެއްދޫގެ ރަށްގިރުމުގެ މައްސަލައަށް ހައްލެއް ހޯދައިދީ އެ ރަށު މަގު ހެދުމުގެ މަޝްރޫއު މިއަހަރު ފަށްޓަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު ހުވަދު އަތޮޅަށް ކުރައްވާ ދަތުރުފުޅުގެ ތެރެއިން ހޯނޑެއްދޫއަށް ވަޑައިގެން އެ ރަށު ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން އެ މަނިކުފާނު ވަނީ، ކެންޕެއިންގެ ތެރެއިން ވެވަޑައިގެންނެވި ވައުދުތައް ފުއްދަވާނެކަމުގެ ޔަޤީންކަން ރައްޔިތުންނަށް ދެއްވާފައެވެ. 

މިއާއެކު ގދ.ހޯނޑެއްދޫގައި ކުރިއަށް ގެންދިޔުމަށް ހަމަޖެހިފައިވާ މަޝްރޫއުތަކުގެ މައުލޫމާތު ހިއްސާކުރައްވަމުން ރައީސް ވިދާޅުވީ، ހޯނޑެއްދޫއަށް ދިމާވެފައިވާ ރަށްގިރުމުގެ މައްސަލައަށާއި، އުދައެރުމުގެ މައްސަލައަށް މި އަހަރުގެ ބަޖެޓުގެ ތެރެއިން ދާއިމީ ގޮތަކަށް ޙައްލު ހޯދައިދެއްވާނެކަމަށެވެ.

އަދި ތަޢުލީމާއި ޞިއްޙީ ދާއިރާ ކުރިއެރުވުމަށާއި، ކުޅިވަރުގެ އެކި ވަޞީލަތްތައް ޤާއިމުކުރުމަށް މަސައްކަތް ކުރައްވާނެކަމުގައިވެސް އެމަނިކުފާނު ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، މަގު ހެދުމުގެ މަޝްރޫއުތައް އެކި ރަށްތަކުގައި އެކި މިންވަރަށް ކުރިއަށް ގެންދަންޖެހޭ ކަމަށާއި ހޯނޑެއްދޫގައިވެސް މަގު ހެދުމުގެ މަޝްރޫއު ކުރިއަށް ގެންދަންޖެހޭކަމަށެވެ. އެގޮތުން، އެމަބުކުފާނުގެ ވައުދުފުޅާއި އެއްގޮތަށް މިއަހަރު އެ ރަށުގައި މަގުހެދުމުގެ މަޝްރޫއު ފައްޓަވާނެކަމަށް ވިދާޅުވިއެވެ.

މިއަހަރުގެ ބަޖެޓަކީ ގެދޮރުވެރިކަމާ ހައުސިންގ މަޝްރޫޢުތައް ފެށުމުގެ ބަޖެޓެއްކަން ފާހަގަކުރައްވައި، ރަށްރަށުގައި ވެވަޑައިގެންފައިވާ ގެދޮރުވެރިކަމުގެ މަޝްރޫޢުތައްވެސް މިއަހަރު ކުރިއަށް ގެންދަވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ. އެގޮތުން ހޯނޑެއްދޫގެ ހައުސިންގ މަޝްރޫޢޫވެސް ކުރިއަށް ގެންދަވާނެކަމުގައި އެމަނިކުފާނު ވިދާޅުވިއެވެ.

މިއަދު ހޯނޑެއްދޫ ރައްޔިތުންނާ ބައްދަލުކޮށްލެއްވުމުގެ ތެރެއިން އެރަށުގެ ފެނާ ނަރުދަމާ ނިޒާމުގެ މަޝްރޫޢު، ރަައީސުލްޖުމްހޫރިއްޔާ ވަނީ ރަސްމީކޮށް އިފުތިތާހުކޮށްދެއްވާފައެވެ. އަދި ބޭންކް އޮފް މޯލްޑިވްސް އިން ހޯނޑެއްދޫގައި އޭ.ޓީ.އެމް އެއް ބެހެއްޓުމުގެ މަސައްކަތް ފެށުމަށްޓަކައި، އެއްބަސްވުމުގައި ސޮއިކުރެއްވުންވެސް މިއަދު ކުރިއަށް ދިޔައެވެ.