އަލްހިޖްރަ ކިޔާ ކުންފުންޏެއްގެ ޙަވާލުގައި އުމްރާއަށް ގޮސް ނާދެވިފައި ތިބި މީހުން ރާއްޖެ ގެނައުމުގެ މަސައްކަތް އެންމެފަހުން ސަރުކާރުގެ ހައްޖު ކުންފުނިން ފަށައިފިއެވެ.

މިފަހަރު ރާއްޖެއިން އުމްރާއަށްދިޔަ މީހުންގެ ތެރެއިން, އަލްހިޖްރަ ކުންފުނީގެ ހަވާލުގައި ދިޔަމީހުނަށް ރިޓާން ޓިކެޓް ނުލިބުމުން އެމީހުން މިހާރު ތިބީ މައްކާގައި ނާދެވިފައެވެ. އެމީހުން ރާއްޖެ އަންނަގޮތަށް އޮތީ މިމަހު 5 ވަނަ ދުވަހުއެވެ. މިކަމާ ގުޅިގެން އިސްލާމިކް މިނިސްޓަރު ޑރ.ޝަހީމް ވަނީ ރާއްޖޭގެ އުމްރާވެރިންގެ ބަޔަކު މައްކާގައި ނާދެވިފައި ތިބި މައްސަލައެއް އެ މިނިސްޓްރީގެ ސަމާލުކަމަށް އައިސްފައިވާކަން ހާމަކޮށްފައެވެ. 

މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ހައްޖު ކޯޕަރޭޝަނުގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވީ، ހިޖްރަ ނަމަކަށް ކިޔާ ޖަމާއަތެއްގެ ހަވާލުގައި އުމްރާގެ އަޅުކަމަށް މައްކާއަށް ދިޔަ ދިވެހިންތަކެއް ހާލުގައިޖެހިފައިވާތީ އެމީހުން އަނބުރާ ރާއްޖެއަށް ގެނައުމަށް ކުރަންޖެހޭ ކަންކަމުގެ އިންތިޒާމުތައް ހަމަޖެއްސުމުގެ މަސައްކަތް އިސްލާމިކް މިނިސްޓަރު ޝަހީމްގެ އިރުޝާދުގެ ދަށުން ކުރައްވަމުން ގެންދަވާ ކަމަށެވެ.

މައްކާގައި ތާށިވި ދިވެހިން ގެނައުމުގެ މަސައްކަތް ހައްޖު ކޯޕަރޭޝަނުން ކުރަން ނިންމުމާ ގުޅިގެން އިސްލާމިކް މިނިސްޓަރު އެކްސްގައި ކުރެއްވި ޕޯސްޓެއްގައި ވިދާޅުވީ، މޯލްޑިވްސް ޙައްޖު ކޯޕަރޭޝަން ވަރުގަދަ ކަމާއެކު ވުޖޫދުގައި އޮންނަންޖެހެނީ ކީއްވެގެންކަން މިއަދު ހާމަވެގެން ހިނގައްޖެ ކަމަށެވެ. އަދި ހައްޖު ކޯޕަރޭޝަނާ މެދު ދިވެހިން އުފާވާންވާނެކަމަށްވެސް މިނިސްޓަރު ފާހަގަކުރެއްވިއެވެ.

މައްކާގައި އުމްރާވެރިން ތާށިވި މައްސަލާގައި މިނިސްޓަރު ޝަހީމް ވިދާޅުވެފައިވަނީ، އެމީހުން އުމްރާއަށްގެންދިޔަ ކުންފުނިން އެކަމުގެ ޒިންމާނަގަން ޖެހޭއިރު، އުމްރާގެ އަޅުކަން އަދާކުރުމަށް ދޭ ފައިސާ އެހެންކަންކަމަށް ބޭނުންކޮށް އުމްރާވެރިން ހާލުގައިޖެހެން ޖެހޭގޮތް މެދުވެރިވުމަކީ ވަރަށްބޮޑު މައްސަލައެއްކަމަށެވެ. ނަމަވެސް ދިވެހިންގެ ބަޔަކު އެހީއަށް ބޭނުންވެފައިވާ ދަނޑިވަޅެއްގައި ފުރަތަމަ އިސްކުރާނީ އެމީހުންގެ ރައްކާތެރިކަން ކަށަވަރުކުރުންކަމަށް މިނިސްޓަރު ވަނީ ވިދާޅުވެފައެވެ.

ވޮއިސްއަށް މައުލޫމާތު ލިބިފައިވާ ގޮތުގައި އަލްހިޖްރަ ކިޔާ ކުންފުންޏެއްގެ ޙަވާލުގައި އުމްރާއަށް ދިޔަ 24 މީހަކު މައްކާގައި ރާއްޖެ ނާދެވިފައި ތިބިއިރު، އޭގެ ތެރޭގައި ކުޑަކުދިންވެސް ހިމެނެއެވެ. އެމީހުން ރާއްޖެ އަންނަން އޮތީ މިމަހުގެ 5 ވަނަ ދުވަހުއެވެ. ނަމަވެސް އަންނަން ޓިކެޓް ހަމަނުޖެހުމުން އެމީހުން ތާށިވީއެވެ. މައުލޫމާތު ލިބިފައިވާ ގޮތުގައި އެމީހުން މައްކާއަށް ދިޔައިރުވެސް ދަތުރުގެ ކަންކަން ހުރީ ވަރަށް ދޯދިއާކޮށެވެ. އެކަން އެޖަމާއަތަށް ނިސްބަތްވާ ބައެއް މީހުން ވަނީ އާއިލާ މީހުންނާ ހިއްސާވެސް ކޮށްފައެވެ.

މިފަހަރަކީ ރާއްޖެއިން އެންމެގިނަ މީހުން އުމްރާއަށްދިޔަ ފަހަރުކަމަށް އިސްލާމިކް މިނިސްޓްރީން ބުނެއެވެ. އެގޮތުން މިފަހަރު 6373 ވުރެ ގިނަ މީހުން އުމްރާގެ އަޅުކަން އަދާކުރުމަށް މައްކާއަށް ގޮސްފައިވާކަމަށް ވަޒީރު ޑރ.މުޙައްމަދު ޝަހީމް ވަނީ ވިދާޅުވެފައެވެ. ޢާއްމުގޮތެއްގައި ރާއްޖެއިން ޑިސެމްބަރު މަހުގެ ޢުމްރާއަށް 4000 އެއްހާ މީހުންކަމަށްދާކަމަށް އިސްލާމީ ކަންތައްތަކާ ބެހޭ ވުޒާރާއިން ހާމަކުރިނަމަވެސް، މިއަހަރަކީ ރެކޯޑް އަދަދަކަށް އުމްރާއަށް މީހުންދިޔަ އަހަރެކެވެ.