އުމްރާއަށް ގެންދިޔަ މީހުނަށް އިހުމާލުވުމުން، އަލް ހިޖުރަ އުމްރާ ގްރޫއްޕު ޖޫރިމަނާކޮށް ހުއްދަ ހިފަހައްޓައިފިއެވެ.

ވޮއިސްއަށް މައުލޫމާތު ލިބިފައިވާ ގޮތުގައި އަލް ހިޖުރަ ކުންފުނި 100،000 ރުފިޔާއިން ޖޫރިމަނާކޮށް އިސްލާމިކް މިނިސްޓްރީން ވަނީ،  ފިޔަވަޅު އަޅާފައެވެ. އިސްލާމިކް މިނިސްޓްރީން އަލް ހިޖުރަ ކުންފުނިންޏާ މެދު ފިޔަވަޅު އަޅާފައިވާއިރު، އެ ކުންފުނިން އުމްރާއަށް ގެންދިޔަ މީހުނަށް އިހުމާލުވުމުގެ މައްސަލައެއް އިއްޔެ ވަނީ ފެންމަތިވެފައެވެ.

މިކަން އިއްޔެ ފެންމަތިވުމުން އިސްލާމިކް މިނިސްޓްރީން ވަނީ، ހައްޖު ކޯޕަރޭޝަން މެދުވެރިކޮށް މައްކާގައި މާލެ ނާދެވިފައިތިބި ދިވެހިން އެކޯޕަރޭޝަނުގެ ބަލަދުވެރިކަމުގެ ދަށަށް ގެނެސްފައެވެ. އެއަށްފަހު މިނިސްޓްރީން މިއަދު ވަނީ އަލް ހިޖުރަ ކުންފުންޏާ ދެކޮޅަށް ހަމަޖެހިފައިވާ އުސޫލުން ފިޔަވަޅުތައް އަޅާފައެވެ. 

އަލް ހިޖުރަ ގްރޫޕަށް އެޅި ފިޔަވަޅުތަކުގެ ތެރޭގައި، އެކުންފުނި ޖޫރިމަނާކުރުމާއި ހުއްދަ އަތުލުމުގެ އިތުރުން، ސަރުކާރުން ކުރަންޖެހުނު ހަރަދުތައް އަނބުރާ ދައްކަންޖެހުން ހިމެނެއެވެ. މީގެ އިތުރުން އަލް ހިޖުރަ ކުންފުނީގެ އެއްވެސް ހިއްސާދާރަކަށް މީހުން އުމްރާއަށް ގެންދިއުމުގެ ހުއްދަ ނުދިނުން ހިމެނެއެވެ.

މިފަހަރު ރާއްޖެއިން އުމްރާއަށްދިޔަ މީހުންގެ ތެރެއިން, އަލްހިޖްރަ ކުންފުނީގެ ހަވާލުގައި ދިޔަމީހުން މައްކާއިން ނުފުރުނީ، ރިޓާން ޓިކެޓް ނުލިބުމުންނެވެ.. އެމީހުން ރާއްޖެ އަންނަގޮތަށް އޮތީ މިމަހު 5 ވަނަ ދުވަހުއެވެ. މައްކާގައި އުމްރާވެރިން ތާށިވި މައްސަލާގައި މިނިސްޓަރު ޝަހީމްރޭ ވިދާޅުވެފައިވަނީ، އެމީހުން އުމްރާއަށްގެންދިޔަ ކުންފުނިން އެކަމުގެ ޒިންމާނަގަން ޖެހޭއިރު، އުމްރާގެ އަޅުކަން އަދާކުރުމަށް ދޭ ފައިސާ އެހެންކަންކަމަށް ބޭނުންކޮށް އުމްރާވެރިން ހާލުގައިޖެހެން ޖެހޭގޮތް މެދުވެރިވުމަކީ ވަރަށްބޮޑު މައްސަލައެއްކަމަށެވެ. ނަމަވެސް ދިވެހިންގެ ބަޔަކު އެހީއަށް ބޭނުންވެފައިވާ ދަނޑިވަޅެއްގައި ފުރަތަމަ އިސްކުރާނީ އެމީހުންގެ ރައްކާތެރިކަން ކަށަވަރުކުރުންކަމަށް މިނިސްޓަރު ވަނީ ވިދާޅުވެފައެވެ.

މިފަހަރަކީ ރާއްޖެއިން އެންމެގިނަ މީހުން އުމްރާއަށްދިޔަ ފަހަރުކަމަށް އިސްލާމިކް މިނިސްޓްރީން ބުނެއެވެ. އެގޮތުން މިފަހަރު 6373 ވުރެ ގިނަ މީހުން އުމްރާގެ އަޅުކަން އަދާކުރުމަށް މައްކާއަށް ގޮސްފައިވާކަމަށް ވަޒީރު ޑރ.މުޙައްމަދު ޝަހީމް ވަނީ ވިދާޅުވެފައެވެ. ޢާއްމުގޮތެއްގައި ރާއްޖެއިން ޑިސެމްބަރު މަހުގެ ޢުމްރާއަށް 4000 އެއްހާ މީހުންކަމަށްދާކަމަށް އިސްލާމީ ކަންތައްތަކާ ބެހޭ ވުޒާރާއިން ހާމަކުރިނަމަވެސް، މިއަހަރަކީ ރެކޯޑް އަދަދަކަށް އުމްރާއަށް މީހުންދިޔަ އަހަރެކެވެ.