ސްރީލަންކާއަށް އެންމެ ގިނައިން ދަތުރުކުރާ ބޭރުގެ އެއަރލައިންއަކަށް އިންޑިއާގެ އިންޑިގޯ ވެއްޖެއެވެ.
އިންޑިއާގެ ހަތަރު ސިޓީއަކުން ލަންކާގެ 2 ސިޓީއަކަށް، ހަފްތާއަކު 54 ފްލައިޓް މިހާރު ބާއްވައެވެ. އިންޑިގޯއިން ލަންކާއަށް ދަތުރުކުރާ މަންޒިލްތަކަކީ ކޮޅުނބާއި ޖަފްނާއެވެ. އިންޑިގޯއިން ލަންކާއާ ގުޅުވާލަދޭ އިންޑިއާގެ ހަތަރު ސިޓީއަކީ ބެންގަލޫރު، ޗެންނާއީ، ހައިދަރުއާބާދު އަދި މުމްބާއީއެވެ.
އިންޑިގޯއިން ބުނީ ލަންކާއާއި އިންޑިއާ ގުޅުވާލަދޭ ރޫޓްތަކަކީ އެކުންފުނީގެ ވިޔަފާރި ފުޅާކޮށް، އިންޑިއާއާއި ލަންކާގެ ގުޅުން އިތުރަށް ހަރުދަނާކުރުމަށް އެ އެއަރލައިނުން އަދާކުރަންޖެހޭ ޒިންމާ އަދާކުރުމަށް ދަތުރުކުރާ ރޫޓްތަކެއް ކަމަށެވެ. އަދި ޖަފްނާއަށް ދަތުރުކުރަނީ ލަންކާގެ އުތުރުގެ ތަރައްގީއަށް ލަންކާގެ ސަރުކާރުތަކުން ކުރަމުންދާ މަސައްކަތަށް އެއްބާރުލުން ދިނުމުގެ ގޮތުން ކަމަށްވެސް އެ އެއަރލައިން އިން ބުންޏެވެ.
ލަންކާގެ ފަތުރުވެރިކަން ބާރު ސްޕީޑްގައި ފުޅާވަމުންދާއިރު، އިންޑިއާއަކީ އެގައުމުގެ އެންމެ މުހިއްމު މާކެޓެވެ. 2024 ވަނަ އަހަރުގެ ނިޔަލަށް ލަންކާއަށް އައި ފަތުރުވެރިންގެ އަދަދަކީ 2 މިލިއަން 53 ހާހެވެ. އޭގެ ތެރެއިން 20 އިންސައްތައަކީ އިންޑިއާގެ ފަތުރުވެރިންނެވެ. ދެން އެންމެ ކައިރިން ވާދަކުރީ ރަޝިޔާއެވެ. އެއީ 9.8 އިންސައްތައެވެ. އެހެންކަމުން އިންޑިއާ މާކެޓަކީ ލަންކާއަށް މުހިއްމު، އަދި މުސްތަގްބަލު އޮތް މާކެޓެކެވެ.
Advertisement
This content is created and paid for by advertisers and does not involve Voice Journalists
