ސްޕެނިޝް ސްޕަކަޕް ފައިނަލްގައި ވާދަވެރި ރެއާލް މެޑްރިޑް ލަނޑެއް ކާމިޔާބުކޮށް ކުރިހޯދާފައި ވަނިކޮށް ފަހަތުން އަރައި 5-2 ގެ ނަތީޖާއަކުން މޮޅުވެ ބާސެލޯނާ އިން މުބާރާތުގެ ޗެންޕިއަންކަން ހޯދައިފިއެވެ.

ބާސެލޯނާ މުބާރާތުގެ ފައިނަލުން ޖާގަހޯދީ ސެމީފައިނަލުގެ ފުރަތަމަ މެޗުގައި 2-0 ގެ ނަތީޖާއަކުން އެތްލެޓިކް ބިލްބާއޯ ބަލިކުރުމަށްފަހުއެވެ. އަދި ރެއާލް ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި 3-0 ގެ ނަތީޖާއަކުން މަޔޯކާ ބަލިކުރުމަށްފަހު އެވެ. އަދި މިދިޔަ ސީޒަނުގެ ސްޕެނިޝް ސުޕަކަޕްގެ ފައިނަލުގައި މިދެޓީމު ވާދަކުރި މެޗު 4-1 ގެ ނަތީޖާއަކުން ކާމިޔާބުކުރީ ރެއާލް މެޑްރިޑެވެ.

ސައުދީ އަރަބިޔާގެ ޖިއްދާގެ ކިންގް އަބްދުﷲ ސްޕޯޓްސް ސިޓީގައި ކުޅެވުނު މިމެޗުގެ ފުރަތަމަ ހާފުގައި ބާސެލޯނާގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ރެއާލް މެޑްރިޑުންނެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ތިން ލަނޑުގެ ލީޑަކާއެކު 4-1 ގެ ނަތީޖާއަކުން ބާސެލޯނާ ކުރީގައި އޮވެގެންނެވެ.

މެޗުގެ ދެވަނަ ހާފުގައި ދެޓީމުންކުރެ ކޮންމެ ޓީމަކުން އިތުރު އެއްލަނޑު ކާމިޔާބުކުރިއިރު، ފަހުހާފުގެ 56 ވަނަ މިނެޓުގައި ބާސެލޯނާގެ ކީޕަރު ސްޒެޒެސްނީއަށް ދެއްކި ރަތްކާޑާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުންތެރިއަކު މަދުކޮށެވެ.

މިމެޗުގައި ބާސެލޯނާގެ ބްރެޒިލް ފޯވާޑް ރަފީނިއާ ދެލަނޑު ކާމިޔާބުކުރިއިރު، އެޓީމުގެ ޒުވާން ފޯވާޑް ލަމީން ޔަމާލް، އަދި ތަޖުރިބާކާރު ފޯވާޑް ރޮބަޓް ލެވޮންޑަސްކީގެ އިތުރުން ޑިފެންޑަރު ބަލްޑޭ މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ރެއާލް މެޑްރިޑްގެ ކިލިއަން އެމްބާޕޭ އަދި ރޮޑްރިގޯ މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު މުބާރާތުގެ މޮޅު ކުޅުންތެރިއަކަށް ހޮވުނީ ބާސެލޯނާގެ ބްރެޒިލް ފޯވާޑް ރަފީނިއާ އެވެ.