މަސްތުވާތަކެތީގެ ވިޔަފާރިކޮށް މަނީ ލޯންޑަރ ކުރުމުގައި އިސްކޮށް ހަރަކާތްތެރިވާކަމުގެ ތުހުމަތުގައި ހައްޔަރު ކޮށްފައި ހުއްޓާ ބަންދުން ދޫކޮށް ދެމީހުން އަލުން ބަންދު ކޮށްފިއެވެ.

މިލިއަނުން މަނީ ލޯންޑަރ ކުރި ކަމުގެ ތުހުމަތުގައި 2024 ޑިސެންބަރު 9 ވަނަ ދުވަހު ހައްޔަރުކޮށްފައިވަނީ . ޏ. ފުވައްމުލައް / ދޫޑިގަން، ކަރަންކާވިލާ، އަޙްމަދު ނިއުޝާދު (34 އަހަރު) އާއި ޏ. ފުވައްމުލައް / ދޫޑިގަން، ޒަމާނީގެ، ޙަސަން ޢާޒިމް (29 އަހަރު) އެވެ.

ފުލުހުން ބުނީ، އެ އިދާރާގެ ތަހުގީގަށް ހޯދިފައިވާ ގޮތުގައި، ފާއިތުވި 5 އަހަރު ތެރޭގައި އަޙްމަދު ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށާ، އަދި ފާއިތުވި 2 އަހަރު ތެރޭގައި ޙަސަން ޢާޒިމްގެ ބޭންކު އެކައުންޓް މެދުވެރިކޮށް 7 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށެވެ.

މިލިއަނުން ފައިސާ ލޯންޑަކުރުމުގެ ތުހުމަތުގައި، މިދިޔަ މަހު ފުވައްމުލައް މެޖިސްޓްރޭޓް ކޯޓުން ޝަރީއަތް ނިމެންދެން ނިއުޝާދާއި އާޒިމް ވަނީ ބަންދު ކޮށްފައެވެ. 

އެ އަމުރު، ހައިކޯޓުން ބާތިލް ކޮށްފައި ވަނިކޮށް، ކްރިމިނަލް ކޯޓުން ވަނީ އެ ދެމީހުން 10 ދުވަހަށް ބަންދު ކުރަން އަމުރު ކޮށްފައެވެ. ބަންދުކުރުމަށް އާ އަމުރެއް ނެރެން ހުރަހެއް ނެތް ކަމަށް ވެސް ކްރިމިނަލް ކޯޓުގެ އަމުރުގައި ފާހަގަކޮށްފައިވެ އެވެ.

ކްރިމިނަލް ކޯޓުގެ ބަންދު އަމުރުގައިވާގޮތުން، އެމީހުން އެ ކޯޓަށް ހާޒިރު ކިރެވުނީ، މާލެއަށް ގޮސް މާލެ ކައިރި ރަށަކަށް ދާން އުޅޭ ކަމުގެ މައުލޫމާތު ފުލުހުންނަށް ލިބިގެންނެވެ. 

ފުވައްމުލަކުގައި ފުލުހުން ހިންގި އޮޕަރޭޝަނުގައި އޭރު 58 މީހުން ހައްޔަރުކޮށްފައިވާ ކަމަށް އެ އިދާރާއިން މީގެ ކުރިން ބުނެފައިވެއެވެ. އަދި މި މައްސަލައާ ގުޅިގެން 21 މީހެއްގެ އަދި 2 ކުންފުންޏެއްގެ އެކައުންޓް ކޯޓު އަމުރުގެ ދަށުން ވަނީ ހިފަހައްޓާފައިވާއިރު، މި ފަރާތްތަކުގެ މައްޗަށް ތުހުމަތުކުރެވޭ މަނީ ލޯންޑަރިންގގެ މައްސަލަ ދިވެހި ފުލުހުންގެ ޚިދުމަތުން މިހާރު ތަހުގީގު ކުރަމުންދާ ކަމަށް ފުލުހުން ބުނެއެވެ.