ކުރިއަށް އޮތް ދުވަސްތަކުގައި ރާއްޖޭގެ މޫސުން ގޯސްވެ، ވިއްސާރަކުރާނެކަމަށް މޫސުމާއި ބެހޭ އިދާރާއިން ލަފާކޮށްފައިވާތީ އެކަމަށް ތައްޔާރުވުމުގެ ގޮތުން، މާލޭގައި ޖޮއިންޓް އޮޕަރޭޝަންސް ސެންޓަރެއް ގާއިމުކޮށްފައިވާކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީ ވިދާޅުވެއްޖެއެވެ.
ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީ މިފަދައިން ހާމަކުރައްވާފައިވަނީ ދިވެހި ފުލުހުންގެ ޚިދުމަތާއި އެމްއެންޑީއެފް އަދި އެންޑީއެމްއޭއިން ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. މި ބައްދަލުވުމުގައި މޭޖަރ ޖެނެރަލް ހިލްމީގެ އަރިހުގައި ކޮމިޝަނަރ އޮފް ޕޮލިސް އަލީ ޝުޖާއު އާއި ނޭޝަނަލް ޑިޒާސްޓަރ މެނޭޖްމަންޓް (އެންޑީއެމްއޭ) ގެ ޗީފް އޮފިސަރ ބައިވެރިވެވަޑައިގެންނެވިއެވެ.
މި ބައްދަލުވުމުގައި ވާހަކަފުޅު ދައްކަވަމުން މޭޖަރ ޖެނެރަލް ހިލްމީ ވިދާޅުވީ، ރައްޔިތުންނަށް އެހީތެރިކަން ފޯރުކޮށްދިނުމަށްޓަކައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިކަމަށް ހާއްސަ ޓާސްކްފޯހެއް އުފައްދާފައިވާކަމަށެވެ. މިކަމުގައި ހަރަކާތްތެރިވާ ފަރާތްތައް އެކުލެވޭ ޖޮއިންޓް އޮޕަރޭޝަންސް ސެންޓަރެއް ސިފައިންގެ މައި މަރުކަޒު، ބަންޑާރަ ކޮށީގައި ގާއިމުކުރެވިފައިވާކަމަށް ހިލްމީ ވިދާޅުވިއެވެ.
"މިކަމުގައި ރައްޔިތުންނަށް އެހީތެރިކަން ފޯރުކޮށްދިނުމުގެ އިސް ދައުރެއް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އާއި މޯލްޑިވްސް ނޭޝަނަލް ޑިފެންސް ފޯސް އާއި އަދި މޯލްޑިވްްސް ޕޮލިސް ސާވިސް ގުޅިގެން ކުރިއަށް ގެންދިޔުމަށްޓަކައި މިހާރު މިވަނީ ޖޮއިންޓް އޮޕަރޭޝަންސް ސެންޓަރެއް ސިފައިންގެ މައި މަރުކަޒު، ބަންޑާރަ ކޮށީގައި ގާއިމުކުރެވިފައި،"
ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީ ވިދާޅުވިއެވެ.
ހިލްމީ ވިދާޅުވީ، ސިފައިންގެ ހިދުމަތްތައް ރާއްޖޭގައި ގާއިމުކުރެވިފައިވާ 4 އޭރިއާ ކޮމާންޑް ސެންޓަރުންވެސް ހިދުމަތްތައް ފޯރުކޮށްދޭނެކަމަށާއި، މާލޭގައި ވެސް މިކަމަށް ހާއްސަ އިސްކަމެއްދީގެން މިހާރުވެސް ވެލި ބަސްތާތައް ޖެހުމާއި ޕަމްޕް ސްޓޭޝަންތައް ބޭނުން ކުރުމަށްޓަކައި ތައްޔާރީ ހާލަތަށް ގެނެވިފައިވާކަމަށެވެ.
މިވަގުތުވެސް މާލޭގެ ތިން ސަރަހައްދަކުން ވެލި ބަސްތާ ލިބޭނެ ނިޒާމް ސިފައިން ހަމަޖައްސާފައިވާކަން ފާހަަގަކުރައްވާ ހިލްމީ ވިދާޅުވީ، މި އޮޕަރޭޝަން ވަރަށް ގާތުން ރައީސް ޑރ.މުޢިއްޒު ބައްލަވަމުން ގެންދަވާކަމަށާއި، ރައްޔިތުންނަށް އެހީތެރިކަން ފޯރުކޮށްދިނުމަށްޓަކައި ކަމާ ގުޅުން ހުރި ހުރިހާ އިދާރާތަކަށް ރައީސް ޑރ.މުޢިއްޒު އިރުޝާދުދެއްވާފައިވާކަމަށެވެ.
Advertisement
This content is created and paid for by advertisers and does not involve Voice Journalists
