މިދިޔަ އަހަރު 73،953 އުޅަނދު ޗެކްކޮށް 7،606 އުޅަނދަކަށް ފިޔަވަޅު އަޅާފައިވާކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

މަގުމަތީގެ ރައްކާތެރިކަން ކަށަވަރުކޮށް މަގުމައްޗަކީ އެންމެނަށް އަމާން ތަނަކަށް ހެދުމަށްޓަކައި ފާއިތުވެ ދިޔަ އަހަރު ކޮށްފައިވާ މަސައްކަތްތަކުގެ ތަފާސްހިސާބުތައް ފުލުހުން ވަނީ އާއްމުކޮށްފައެވެ. މި ތަފާސްހިސާބުތަކަށް ބަލާއިރު، އުޅަނދު ދުއްވި 66،347 މީހަކަށް ނަސޭހަތް ދީފައިވާއިރު، 7،606 މީހަކަށް ވަނީ ވަޔަލޭޝަން ސްލިޕް ދޫކޮށްފައެވެ.

މީގެ އިތުރުން، ލައިސަންސް ނެތި ދުއްވި 2،138 މީހަކު ފާހަގަކޮށްފައިވާއިރު، މީގެ ތެރޭގައި ދެފުރޮޅުލީ 2،005 އުޅަނދާއި ހަތަރު ފުރޮޅުލީ 133 އުޅަނދު ހިމެނެއެވެ. ފުލުހުން ބުނީ، ނުރައްކާތެރިކޮށް ދުއްވުމުގެ 293 މައްސަލަ ފާހަގަކުރެވިފައިވާކަމަށާއި، އޭގެތެރޭގައި ދެފުރޮޅުލީ 271 އުޅަނދާއި ހަތަރު ފުރޮޅުލީ 22 އުޅަނދު ދުއްވުމުގެ މައްސަލަތައް ހިމެނޭކަމަށެވެ.

ފާއިތުވި އަހަރުގެ ޓޯވ އޮޕަރޭޝަންތަކުގައި ޖުމްލަ 15،514 އުޅަނދު ޓޯވ ކޮށްފައިވާކަން ފާހަގަކޮށް ފުލުހުން ބުނީ، މީގެ ތެރޭގައި 11،645 މޮޓޯސައިކަލް، 2،567 ކާރު، 478 ޕިކަޕް، 369 ވޭން އަދި 87 ޓްރަކް ހިމެނޭކަމަށާއި، ޓޯވ ކުރެވުނު އުޅަނދުތަކުގެ ތެރެއިން 546 އުޅަނދު ނައްތާލެވުނު އިރު، 13،562 އުޅަނދު ވެރިފަރާތާއި ހަވާލުކުރެވިފައިވާކަމަށެވެ.

މަގުމަތީގެ ނުރައްކާތެރި އެކްސިޑެންޓުތައް ހިނގުމަކީ ކަންބޮޑުވާކަމަކަށްވާއިރު، އެކްސިޑެންޓުތައް މަދުކުރުމަށް ގިނަ ވަސީލަތްތަކެއް ބޭނުންކޮށްގެން ހަރުދަނާ މަސައްކަތްތަކެއް ފާއިތުވި އަހަރު ވަނީ ކޮށްފާކަމަށާއި، އޭގެ ތެރޭގައި ފުރާނައަށް ނުރައްކާވާފަދަ އެކްސިޑެންޓުތައް މަދުކުރުމަށް އެކަމަށް ވަކިން ހާއްސަކޮށް މަސައްކަތްތަކެއް ކުރެވިފައިވާކަމަށް ފުލުހުން ބުނެއެވެ.