ޢުމްރާއަށް ފުރަން ކަމަށް ބުނެ ގްރޫޕަކުން އެމްއެމްއޭއިން ޓިކެޓަށް ދޫކުރާ ޑޮލަރު ހޯދި މައްސަލައެއް ބަލަމުންދާކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
ވަޒީރު ޝަހީމް ވިދާޅުވީ، ޢުމްރާއަށް މީހުން ގެންދިއުމަށް އެ ވުޒާރާއިން ދީފައިވާ ރަސްމީ ލައިސަންސް ބޭނުންކޮށްގެން އުމްރާއަށް ފުރަން ކަމަށް ހަދައި އެމްއެމްއޭ އިން ޑޮލަރު ނެގުމަށްފަހު، ޢުމްރާއަށް ގޮސްފައި ނުވާކަމަށް ބެލެވޭ ގްރޫޕެއްގެ މައްސަލަ ފާހަގަވެފައިވާކަމަށެވެ.
އެ ގްރޫޕު އެކަން ކުރިކަން ސާބިތުވެއްޖެނަމަ އެކުންފުނި 30 ހާސް ރުފިޔާއިން ޖޫރިމަނާކޮށް، ހުއްދަ ހިފަހައްޓައި، މައްސަލަ ތަޙްޤީޤުކުރަން ފުލުހުންނަށް ހުށައަޅާނެކަން ފާހަގަކުރައްވާ ވަޒީރު ވިދާޅުވީ، ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްސް ހުށަހެޅުމުންކަމަށްވާއިރު، އެކަން ވާނީ ފޭކު ޑޮކިއުމެންޓް ހުށަހެޅުމަށްކަމަށެވެ.
ޢުމްރާއަށް މީހުން ގެންދިއުމުގައި އަމަލުކުރަން ޖެހޭ އުސޫލަށް އަމަލުނުކުރާ ގްރޫޕްތަކަށް އިސްލާމީ ކަންތައްތަކާއި ބެހޭ ވުޒާރާއިން ފިޔަވަޅު އަޅަމުން އަންނައިރު، މިހާތަނަށް އުސޫލާއި ޚިލާފުވި 19 ކުންފުންޏެއް ވަނީ 5000 ރުފިޔާއިން ޖޫރިމަނާކޮށްފައެވެ.
Advertisement
This content is created and paid for by advertisers and does not involve Voice Journalists
