ޤަތަރުގައި ބޭއްވުމަށް ހަމަޖެހިފައިވާ އަލްފާ ވެބް ޕްރޮގްރާމްގައި ބައިވެރިވުމުގެ ފުރުސަތު ރާއްޖޭގެ ޓެކް ކުންފުންޏެއް ކަމަށްވާ ސިނެޓެކްސްއަށް ލިބިއްޖެއެވެ.

ކުރިއަށްއޮތް ފެބުރުއަރީމަހުގެ 22 ހުން 26 ގެ ނިޔަލަށް ޤަތަރުގެ ވެރިރަށް ދޯހާގައި ކުރިއަށްދާ މި ވެބްސަމިޓަށް ސިނެޓެކްސްއަށް ފުރުސަތު ލިބިފައިވާއިރު، މިއީ ރާއްޖޭގެ ކުންފުންޏަކަށް މި ޕްރޮގްރާމުން ފުރުސަތު ލިބުނު ފުރަތަމަ ފަހަރެވެ. މި ވެބް ޕްރޮގްރާމުން ސިނެޓެކްސްއަށް ފުރުސަތު ލިބިފައިވަނީ، އިންތިޒާމްކުރާ ފަރާތުން ކުރިއަށްގެންދިޔަ އިވެލުއޭޝަން މަރުހަލާގެ ތެރެއިން އެކުންފުނީގެ ހުށަހެޅުމުގެ ފެންވަރަށް ބެލުމަށްފަހުއެވެ.

ސިނެޓެކްސްއިން ބުނީ އެކުންފުނީގެ އަމާޒަކީ 1.2 ބިލިއަން މީހުނަށް ބަހުގެ މުއާމަލާތްކުރުމަށް ހުރި ހުރަސްތައް ނައްތާލުމަށް މަސައްކަތްކޮށް ބަހުގެ އަހުލުވެރިންނަށް އެމީހުންގެ އަސްލާއި ސަގާފަތް ރައްކައުތެރިކޮށްދިނުން ކަމަށެވެ. މީގެ އިތުރުން ދިރުންހުރި ރަށްވެހި ޑިޖިޓަލް އިޤްތިސާދެއް ބިނާކުރުމަކީވެސް އެކުންފުނީގެ ތަސައްވަރުގެ ތެރޭގައި ހިމެނޭ މުހިއްމު ކަމެއ ްކަމަށެވެ.

ޤަތަރުގައި ބޭއްވުމަށް ހަމަޖެހިފައިވާ ވެބް ސެމިނާގައި ބައިވެރިވުމުގެ ފުރުސަތު ލިބުމާ ގުޅިގެން އެކަން ފާހަގަކުރައްވައި ސިނެޓެކްސްގެ ސީއީއޯ އިސްމާޢީލް ކަލީމް ވިދާޅުވީ، އެލްފާ ޕްރޮގްރާމަށްހޮވުމަކީ އެ ޕްރޮގްރާމުގެ ތެރެއިން ސިނެޓެކްސްއަށާއި، ދިވެހިރާއްޖޭގެ ޓެކް އިކޯސިސްޓަމަށް މިހާތަނަށް ނުލިބޭފަދަ ފުރުސަތުތަކެއް ފަހިވެގެންދާނެ ކަމެއް ކަމަށެވެ. އަދި ބައިނަލްއަޤްވާމީ އެފަދަ ބޮޑު ޕްލެޓްފޯމެއްގައި ވާދަކޮށްލަން ފުރުސަތު ލިބިގެންދިއުމަކީ ސިނެޓެކްސްގެ އުފެއްދުންތައް ދައްކާލުމަށް ލިބިގެންދާނޭ ވަރަށް ރަނގަޅު ފުރުސަތެއްކަމަށްވެސް ކަލީމް ފާހަގަކުރެއްވިއެވެ.

މި ޕްރޮގްރާމްގެ ތެރެއިން ބައިނަލްއަޤްވާމީ ޓެކް އިންޑަރސްޓްރީގެ ފަރާތްތަކާއި ބައްދަލުވެ، ވަރަށްރަނގަޅު ގުޅުންތަކެއް ގާއިމްކުރެވިގެންދާނޭކަމަށްވެސް ސިނެޓެކްސްއިްނ ދެކެއެވެ. ސިނެޓެކްސްއަކީ ބަދަލުވެކުރިއަރަމުންދާ ޓެކްނޮލޮޖީ ދުނިޔޭގެ ފަސޭހަކަން ދިވެހިންނަށް ގެނެސްދިނުމުގައި އެފަދަ ދެވަނައެއްނެތް ކުންފުންޏެކެވެ.

ސިނެޓެކްސްގެ ފާހަގަކޮށްލެވޭ އުފެއްދުންތަކުގެ ތެރޭގައި އޭއައި އެޕްލިކޭޝަނެއްކަމަށްވާ "ތާނައޭއައި" ފާހަގަކޮށްލެވެއެވެ. އެ އެޕްލިކޭޝަނަކީ ފަސޭހަކަމާއެކު ދިވެހިބަހުން މަޒުމޫނާއި، ސިޓީއާއި ވާހަކަ އަދި ހުލާސާ ލިޔުންތައް ތައްޔާރުކޮށްލެވޭ އެޕްލިކޭޝަނެކެވެ. ސިނެޓެކްސް އިން ވަނީ މީގެކުރިން ދިވެހި ބަހުން ދައްކާ ވާހަކަ ލިޔުމަށް އަދި ލިޔެފައި ހުންނަ ލިޔުންތައް ދައްކާ ވާހަކައަށް ބަދަލުކޮށްލުމުގެ ގާބިލްކަން ލިބިގެންވާ އެޕްލިކޭޝަނެއްވެސް ތައާރަފްކޮށްފައެވެ.