އާސަންދައިގެ ދަށުން ދުބާއީގެ ބުރުޖީލް މެޑިކަލް ސިޓީން، ކިޑްނީ ބަދަލުކުރުމުގެ އޮޕަރޭޝަން ކުރެވޭނެ އިންތިޒާމު ހަމަޖައްސައިފިއެވެ.

އަސަންދައިގެ ހިދުމަތްތައް ފުޅާކުރުމަށް ކުރަމުންދާ މަސައްކަތްތަކުގެ ދަށުން ދުބާއީ އާއި ތައިލެންޑުގެ ހޮސްޕިޓަލްތަކުން އާސަންދައިގެ ހިދުމަތް ލިބޭގޮތް ހަމަޖެއްސުމަކީ ރައީސް ޑރ.މުހައްމަދު މުއިއްޒު ސަރުކާރުގެ ސިޔާސަތެކެވެ. މިކަމާ ގުޅޭގޮތުން މިއަދު އާސަންދައިން ބުނީ، ދުބާއީ އާއި ތައިލެންޑްގެ ހޮސްޕިޓަލްތަކުން އާސަންދައިގެ ހިދުމަތްދިނުމަށް ކުރަމުންދިޔަ މަސައްކަތުގެ ދަށުން، މިހާރު އެ ދެ ޤައުމަށް އާސަންދައިގެ ދަށުން ބޭސްފަރުވާއަށް ދިއުމުގެ ފުރުސަތު ހުޅުވާލާފައިވާކަމަށެވެ. 

އާސަންދަ ކުންފުނިން ވަނީ ދުބާއީގެ ބުރްޖީލް މެޑިކަލް ސިޓީއާއެކު އާސަންދައިގެ ހިދުމަތް ދިވެހިންނަށް ދިނުމުގެ ގޮތުން މިދިޔަ ޑިސެމްބަރުމަހުގެ ތެރޭގައި އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން އެ ހޮސްޕިޓަލަށް މީހުން ފޮނުވުމުގައި އާސަންދައިން މިވަގުތަށް ހާއްސަ ކޮށްފައިވަނީ ކިޑްނީ ބަދަލުކުރަންޖެހިފައިވާ މީހުންނަށެވެ. 

Advertisement

މިކަމާ ގުޅޭގޮތުން މައުލޫމާތު ހިއްސާކުރައްވަމުން އާސަންދައިގެން މެނޭޖިން ޑިރެކްޓަރު އައިމިނަތު ޒީނިޔާ ވިދާޅުވީ، އާސަންދަ މެދުވެރިކޮށް ދުބާއީގެ ބުރުޖީލް މެޑިކަލް ސިޓީން ކިޑްނީ ބަދަލުކުރަންޖެހޭ ފަރާތްތަކަށް މިހާރު އޮޕަރޭޝަން ކުރެވޭނޭކަމަށެވެ. އެގޮތުން އެފަދަ ފަރާތްތަކުން އާސަންދައަށް އެދި ހުށަހެޅުމުން ހަމަޖެހިފައިވާ އުސޫލްތަކުގެ ތެރެއިން އެކަންކުރެވިގެންދާނޭކަމަށް އޭނާ ވިދާޅުވިއެވެ. އެގޮތުން ފުރަތަމަ އިސްކަންދޭނީ އާއިލާގެ ތެރެއިން ކިޑްނީ ނުލިބި ބަލީގައި ގިނަދުވަސްވެފައިވާ ފަރާތްތައްކަމަށް ޒީނިއާ ފާހަގަކުރެއްވިއެވެ. އެއަށްފަހު ދެން އެންމެބޮޑަށް އިސްކަންދިނުމަށް ހަމަޖެހިފައިވަނީ ރާއްޖެ، އިންޑިޔާ ނުވަތަ ސްރީލަންކާގެ މަރުކަޒެއް މެދުވެރިކޮށް، އެތައް ފަހަރެއްގެ މަތިން ފަރުވާދެވުނު ނަމަވެސް އެފަރާތެއްގެ ބަލި ޙާލަތަށް ކުރިއެރުމެއް ނުލިބި، ބަލި ތަޙައްމަލު ކުރަމުންދާ މީހުންނަށެވެ. 

އާސަންދައިގެ ހިދުމަތް މިހާރު ލިބެމުން އަންނަ އިންޑިއާ އަދި ސްރީލަންކާ ފަދަ ޤައުމުތަކުގައި ކިޑްނީ ބަދަލުކުރުމުގެ އޮޕަރޭޝަން ކުރަން ވެއްޖެނަމަ އެ ޑޯނަރު ވާންޖެހެނީ ބަލިމީހާގެ އާއިލާގެ މީހަކަށެވެ. ދުބާއީގެ ބުރްޖީލް މެޑިކަލް ސިޓީން ޑޯނަރުންގެ ގޮތުގައި ބަލިމީހާގެ އާއިލާއާ ގާތްމީހުންގެ އިތުރުން އެޤައުމަށް ނިސްބަތްވާ މުސްލިމެއް ހަމަޖެހުނު ނަމަވެސް އެޤައުމުގެ ކަމާބެހޭ ފަރާތްތަކުގެ ހުއްދަލިބޭގޮތަށް އޮތުމަކީ، އެ ހޮސްޕިޓަލުން އާސަންދައިގެ ހިދުމަތް ލިބޭގޮތަށް ހަމަޖައްސަން ޖެހުނު އެއް ސަބަބުކަމަށް އާސަންދަ ކުންފުނިން ބުނެއެވެ.

މިކަމާ ގުޅޭގޮތުން އެންސްޕާގެ ސީއީއޯ ހީނާ ވަލީދު ވިދާޅުވީ، ތައިލެންޑް އަދި ދުބާއީއަށް ބަލިމީހުން ފޮނުވާނީ ވަކި ސިލެކްޝަނެއް ހަދައިގެން ނޫންކަމަށެވެ. އެގޮތުން އާސަންދައިގެ ދަށުން ބޭރަށްދިއުމަށް އެދި ހުށަހެޅުމުން ޑޮކްޓަރުން އެކަން ބެއްލެވުމަށްފަހު އެބޭފުޅުން ކަނޑައަޅާ ގޮތެއްގެ މަތިން، މީގެ ކުރިންވެސް އެކަންކުރި އުސޫލުގެ މަތިން ބަލިމީހުން ބޭރަށް ފޮނުވަމުންދާނޭކަމަށް ހީނާ ފާހަގަކުރެއްވިއެވެ.

އާސަންދއިގެ ދަށުން ތައިލެންޑަށް ބޭސްފަރުވާގެ ކަންކަމުގައި ފޮނުވުމަށް އިސްކަންދިނުމަށް ނިންމާފައިވަނީ، ގިނަ ދުވަސްވަންދެން އެ ބައްޔަކަށް ފަރުވާކުރަމުންދާ މިހާތަނަށް އަލިމަގެއް ނުފެންނަ ފަރާތްތަކެވެ. ތައިލެންޑް އަދި ޔޫއޭއީއަށް އާސަންދައިގެ ދަށުން ބޭސްފަރުވާ ހޯދަމަށްދާ މީހާގެ ހަރަދުތައް އާސަންދައިން ކަވަރކުރާ އުސޫލުން ބަލިމީހާގެ އެހީތެރިޔާގެ ގޮތުގައި ދާފަރާތުގެ ޓިކެޓާއި އިތުރު ހަރަދުތައް އެދިއްޖެ ހިނދެއްގައި ހަމަޖެހިފައިވާ އުސޫލުގެ ތެރެއިން ލިބެމުންދާނޭކަމަށް އާސަންދައިން ބުނެއެވެ.