އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މާލޭގައި ހިންގާ ޖަގަހައަކަށް ކަޅުތެޔޮ ޖެހި މައްސަލައެއް ދިވެހި ފުލުހުންގެ ޚިދުމަތުން ތަހުގީގުކުރަން ފަށައިފިއެވެ.
ސަރުކާރު ހިންގާ މައި ޕާޓީ ޕީއެންސީއަށް، އެމްޑީޕީގެ ބައެއް މެމްބަރުންނާއި އެއްވެސް ސިޔާސީ ޕާޓީއަކާ ނުގުޅި ތިބި ބައެއް މީހުން، ވަގު ފޯމުތަކެއް ފުރައިގެން ވައްދާފައިވާ މައްސަލައެއް މިފަހުން ވަނީ ފެންމަތިވެފައެވެ.
އެ ފޯމުތަކުގައި ހެކިންގެ ގޮތުގައި ސޮއިކޮށްފައި ތިބި މީހުންގެ ފޮޓޯ، އެމްޑީޕީގެ ދަނޑިކޮށި ޖަގަހައިގެ ގޭޓުގައި ހަރުކޮށްފައިވަނިކޮށް އެ ޖަގަހައަށް ރޭގެ ވަގުތެއް ބަޔަކު ވަނީ ކަޅުތެޔޮ ޖަހާފައެވެ.
އެކަމާ ގުޅިގެން ފުލުހުންގެ މީޑިއާ އޮފިސަރު ވިދާޅުވީ، ރޭ 00:59 ހާއިރު ޗާންދަނީ މަގުގައި ހުންނަ އެމްޑީޕީ 'ދަނޑިކޮށި ޖަގަހަ' އަށް ކަޅުތެޔޮ ޖެހި މައްސަލަ ފުލުހުންނަށް ރިޕޯޓުކޮށްފައިވާ ކަމަށެވެ.
އަދި އެ މައްސަލަ ފުލުހުން މިހާރު ތަހުގީގުކުރަމުންދާ ކަމަށް ވެސް އޮފިސަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
