ދިވެހިރާއްޖެއަށް ބަލާއިރު، އިގްތިސާދުގައި މިހާރު އެންމެބޮޑަށް ފުޅާވަމުން އަންނަ އެއް ދާއިރާއަކީ ލޯކަލް ޓޫރިޒަމެވެ. މީގެކުރިން ދިވެހިރާއްޖެއަށް ތައާރަފްވި ފަތުރުވެރިކަމުގެ ސިނާއަތުގައި ނަންހިނގަމުންއައި މައިގަނޑު ވިޔަފާރިތަކަކީ ޓޫރިސްޓް ރިސޯޓްތަކާއި  ސަފާރީތަކުގެ އިތުރުން ހޮޓާތަކެވެ. ނަމަވެސް މިއަދު ޓޫރިޒަމް ވިޔަފާރީގައި އެންމެބޮޑަށް ކުރިއަރައިގެން އަންނަނީ ލޯކަލް ޓޫރިޒަމްގެ ގޮތުގައި ގެސްޓްހައުސް ވިޔަފާރިއެވެ.

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލައިރު، ރާއްޖޭގައި ލޯކަލް ޓޫރިޒަމަށް ކުރާ އިންވެސްޓްމަންޓްތައް އަހަރަކަށްވުރެ އަހަރެއް އަންނަނީ ވަރަށްބޮޑަށް އިތުރުވަމުންނެވެ. މިގޮތުން 2024 ވަނަ އަހަރު ނިމުނުއިރު ރާއްޖޭގައި ރަޖިސްޓްރީކޮށްގެން ހިންގަމުން އަންނަ 929 ގެސްޓްހައުސް އެބަހުއްޓެވެ. އެތަންތަނުގައި 15 ހާހަށްވުރެ ގިނަ އެނދު އެބަހުއްޓެވެ.

މާކެޓިން ފާމެއްކަމަށްވާ ދަ ތްރެވަލް ގައިޒްއިން އިންތިޒާމްކޮށްގެން ބޭއްވުމަށް ތައްޔާރުވަމުންދާ، ރަށު އެކްސްޕޯއަކީ ދިވެހިރާއްޖޭގެ ރަށްތަކުގެ ރީތިކަމާއި ސަގާފަތާއި އެކިއެކި ހަރަކާތްތައް ދައްކުވައިދޭގޮތަށް ރާއްޖޭގައި ފުރަތަމަ ފަހަރަށް އިންތިޒާމުކުރާ މިބާވަތުގެ ފުރަތަމަ އެކްސްޕޯއެވެ. "ރަށު އެކްސްޕޯ 2025" ބޭއްވުމަށް ހަމަޖެހިފައިވަނީ، އަންނަ ފެބުރުއަރީމަހުގެ 13 އިން 15 އަށް ހުޅުމާލޭ ސެންޓްރަލް ޕާކްގައެވެ.

ރާއްޖޭގައި ގެސްތްހައުސްގެ ވިޔަފާރިއަކީ މިހާރު އިގްތިސާދުގައި ކުރިއަރަމުން އަންނަ ވިޔަފާރިއެވެ. ކޮންމެ އަހަރަކުވެސް ގިނަ އަދަދެއްގެ ގެސްޓްހައުސްތައް މާކެޓަށް ތައާރަފްވެއެވެ. ރަށު އެކްސްޕޯއަކީ ލޯކަލް ޓޫރިޒަމަށް ހާއްސަ އެކްސްޕޯއެއްކަމުން މި އެކްސްޕޯގައި ރާއްޖޭގައި ހިންގާ ގިނަ އަދަދެއްގެ ގެސްޓްހައުސްތަކުން ބައިވެރިވެއެވެ. އެހެންކަމުން މިފަދަ އެކްސްޕޯއެއްގައި ބައިވެރިވުމުން ރަށް އިޝްތިހާރުވެ، އެރަށެއް ގިނަ ބަޔަކަށް އެންގި ރަށަށް ޝައުގުވެރިކަން އުފެދިގެން ދިއުމުގެ ފުރުސަތު ފަހިވެގެން ދެއެވެ.

މި އެކްސްޕޯ ތެރޭގައި ގެސްޓް ހައުސް އަދި އެހެނިހެން ލޯކަލް ޕެކޭޖްތައް ވިއްކާލުމުގެ ފުރުސަތު ލިބިގެންދާއިރު، އަތޮޅުތެރޭގެ ރަށްތަކުގެ މީރު އެކި އެކި ކެއުންތަށް ދައްކާލާ، އިޝްތިހާރުކުރެވި އަދި ވިއްކާލުމުގެ ފުރުސަތުވެސް ރަށު އެކްސްޕޯގެ ތެރެއިން ފަހިވެގެން ދެއެވެ.

ރަށު އެކްސްޕޯއަކީ ވަރަށް ގިނަ އަދަދެއްގެ ފަރާތްތަކުން ޒިޔާރަތްކުރާ އިވެންޓެއްކަމުން މި އެކްސްޕޯގެ ތެރެއިން ވިޔަފާރި ފުޅާކުރުމަށް އެކި ފަރާތްތަކުގެ އެހީތެރިކަންލިބި ޝައުގުވެރިކަން އުފެދިގެން ދާނެއެވެ. ސަބަބަކީ މި އެކްސްޕޯއަށް އެކި ދާއިރާތަކުގެ ވިޔަފާރިވެރިންނާއި ގިނަ އަދަދެއްގެ އާއްމު ފަރާތްތަކުން ޒިޔާރަތް ކުރާނެތީއެވެ. މިކަމުގެ ސަބަބުން އެތައް ފުރުސަތުތަކެއް ފަހިވެ، އިގްތިސާދީގޮތުން ރަށަށް އެތައް ކުރިއެރުންތަކެއް ލިބިގެންދާނެއެވެ.