ކަލަންޑަރަކީ ހަމައެކަނި ތާރީހު ބެލުމަށް ބޭނުންކުރާ އެއްޗެއްގެ ގޮތުގައި އޮތްއޮތުން އުރީދޫއިން މިވަނީ ބަދަލުކޮށްލާފައެވެ. އުރީދޫއިން ނެރުނު މިއަހަރުގެ ކަލަންޑަރަކީ ހަމައެކަނި ތާރީހު ބަލާލުމަށް ނުވަތަ މޭޒުމަތި ފަޅުފިލުވާލަދިނުމަށް ބޭނުންކުރާ އެއްޗެއްގެ ބަދަލުގައި އެއަށްވުރެ މާ ފުޅާދާއިރާއެއްގައި ބޭނުންކުރެވޭގޮތަށް ފަރުމާކޮށްފައިވާ ކަލަންޑަރެކެވެ. 

އުރީދޫއިން ނެރުނު މިއަހަރުގެ ކަލަންޑަރު ފަރުމާކޮށްފައިވަނީ ދިވެހި ސަގާފަތުގައި ހިމެނޭ މަޝްހޫރު ބައެއް ވާހަކަތަކުގެ ކެރެކްޓަރތައް ހިމަނައިގެން ޒަމާނީ ޓެކްނޮލޮޖީގެ އެހީގައި އެ ކެރެކްޓަރތަކާ މުއާމަލާތްކޮށްލެވޭ ގޮތަށެވެ. އުރީދޫއިން ވަނީ ކަލަންޑަރުގައި ހިމެނޭ ކޮންމެ މަހަކަށް ކެރެކްޓާއެއް ހިމަނާފައެވެ. 

އުރީދޫ ކަލަންޑަރުގެ ޖެނުއަރީމަހުގެ ޕޭޖްގައި އިންނަ ކިއުއާރުކޯޑް ސްކޭންކޮށްލުމާއެކު، ފޫޅުދިގުހަންޑިއާ ޗެޓްކޮށްލުމަށް ޗެޓް ބޮކްސްއަށް ޕޭޖަށް ދެވޭނެއެވެ. އެޑްވާންސް އޭއައި ޗެޓްބޮޓް ޓެކްނޮލޮޖީ މެދުވެރިކޮށް އުރީދޫއިން ގެނެސްދިން މި ހިދުމަތުގެ އެންމެ މުހިއްމު އެއްކަމަކީ ދިވެހިބަހުންވެސް ފޫޅުދިގުހަންޑިއާ ޗެޓްކޮށްލައި ބޭނުންވާ ސުވާލުތައް ކުރެވޭ ކަމެވެ. އުރީދޫއިން މި ހިދުމަތް ފައްކާކޮށްފައިވަނީ، ކުޑަކުދިންވެސް ނިކަން ޝައުގުވެރިވާ ގޮތަކަށެވެ. 

ފޫޅުދިގު ހަންޑިއާ ސުވާލުކުރުމުން ޖަވާބު އަންނަގޮތްވެސް ނިކަން ޝައުގުވެރިއެވެ. އުރީދޫއިން މި ޗެޓް ފަރުމާކޮށްފައިވަނީ، ހުރިހާ އުމުރުފުރައަކާވެސް ގުޅޭގޮތަށްކަން ފާހަގަކޮށްލެވެއެވެ.

ފޫޅުދިގު ހަންޑިއާ ކޮށްފައިވާ ޗެޓްގެ ސްކްރީންޝޮޓެއް...

އަހަރެމެންނަށް މިއޮއްހާދުވަހު އެނގިފައިއޮތްގޮތުން ފޫޅުދިގުހަންޑި މި ކެރެކްޓާއަކީ ފިރިހެނެކެވެ. ނަމަވެސް އުރީދޫ ކަލަންޑަރުގައި ފޫޅުދިގުހަންޑި ގެނެސްދީފައިވަނީ އަންހެނެއްގެ ގޮތުގައެވެ. އުރީދޫ ކަލަންޑަރުގައި ކެރެކްޓާތައް ހިމެނިއިރު، އެކުންފުނިންވަނީ، މިކަމާ ގުޅޭގޮތުން ކަމާބެހޭ އެކި ދާއިރާތަކުގެ މީހުންގެ ވާހަކަތަކާއި ތާރީހީ ވާހަކަތައް ނިކަން ރަނގަޅަށް ދިރާސާކޮށްފައެވެ.

އުރީދޫ ކަލަންޑަރުގައި ހިމެނޭ ކެރެކްޓާތަކުގެ ތެރޭގައި، މާކުންބެ، ހަންޑިގަނޑުވަރު ދޮންކަމަނަ، ސަންތިމަރިޔަނބު، އޮޑިތާން ކަލޭގެ، ބަޑިއެދުރު އަދި ސަފަރުކަތްދަ ފާހަގަކޮށްލެވެއެވެ.