ޓްރާންސްފޯމަރަކުން ވައްކަންކުރަން އުޅުނު ބަޔަކު ހުއްޓުވުމަށް މަސައްކަތްކަތްކުރި މުވައްޒަފުންގެ މަސައްކަތް ސްޓެލްކޯއިން ފާހަގަކޮށްފިއެވެ.

ސްޓެލްކޯއިން ކުރި ޕޯސްޓެއްގައި ބުނީ، ޓްރާންސްފޯމަރުން ވައްކަންކުރަން އުޅެނިކޮސް އެކަން ހުއްޓުވި މުއައްޒަފުންގެ ތެރެއިން އެއް މުވައްޒަފަކަށް ސްޓެލްކޯގެ 'މެޑަލް އޮފް ބްރޭވަރީ' ވަނީ އަރުވާފައިވާކަމަށެވެ. އަދި އަނެއް މުވައްޒަފަށް އެކަމުގެ ހަނދާނީ ލިއުމެއް އަރުވާފައިވާކަމަށެވެ. ސްޓެލްކޯއިން ބުނީ އެ މުވައްޒަފުންގެ އަގުވަޒަންކޮށްފައި މިވަނީ ނުރައްކަލުގެ އެ ވަގުތުގައި ދައްކުވައިދިން ހިތްވަރާއި ކެރުންތެރިކަން ފާހަގަކުރުމުގެ ގޮތުންކަމަށެވެ. 

ސްޓެލްކޯއިން ބުނީ މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމަށް ސްޓެލްކޯއިން އަބަދުވެސް މަސައްކަތް ކުރާނެކަމަށެވެ. އަދި މިފަދަ ހާދިސާތަކަށް ޚާއްސަ ސަމާލުކަމެއް ދީގެން ވަރަށް ޙައްސާސް މައްސަލަތަކެއްގެ ގޮތުގައި ބަލައި، ފިޔަވަޅުއަޅަމުން ދާނެކަމުގެ ޔަޤީންކަންދޭ ކަމަށްވެސް ސްޓެލްކޯއިން ބުނެއެވެ.

ރޭ ހިނގި އެ ހާދިސާގައި ޓްރާންސްފޯމަރުން ވައްކަންކުރަން އުޅުނު މީހާ ވަނީ ސްޓެލްކޯގެ މުއައްޒަފަށް ރެންޗަކުން ހަމަލާދީފައެވެ. ރެންޗުން މުއައްޒަފަށް ހަމަލާދިނުމުގެ ސަބަބުން އޭނާގެ ބޮލައި ތުންފަތް ވަނީ ފަޅައިގެން ގޮސްފައެވެ.

މި ފަހަކަށް އައިސް ސްޓެލްކޯގެ ފޯމަރުތަކުން ވައްކަންކުރުމުގެ މައްސަލަތައް އިތުރުވެފައިވާއިރު، ފޯމަރުތައް ބަހައްޓާފައިހުންނަތަނަށް އެގޮތަށް ވަދެގެންއުޅުމަކީ ވަރަށް ނުރައްކާތެރިކަމެއްކަމަށް ސްޓެލްކޯއިން ވަނީ ބުނެފައެވެ. މިގޮތަށް ފޯމަރުބަހައްޓާފައި ހުރިތަނަކަށް ވަދެ ވައްކަންކުރަން އުޅުމުގެ ތެރޭގައި މިދިޔަ އަހަރުގެ ތެރޭގައި މީހަކު މަރުވެފައިވާއިރު، ސްޓެލްކޯއިން ވަނީ ތަކުރާރުކޮށް އެތަންތަނަށް ވައްކަންކުރަން ނުވަނުމަށް އިލްތިމާސްކޮށްފައެވެ.