ޕޯޓަލް މެދުވެރިކޮށް ސިޔާސީޕާޓީތަކަށް މީހުން ވެއްދުން މެދުކަނޑާލުމަށް އިލެކްޝަން ކޮމިޝަނުން ނިންމައިފިއެވެ.
ޕާޓީތަކަށް މީހުން ވެއްދުމުގައި މިހާރު ބޭނުންކުރަމުން އަންނަނީ "ސިމަދަ ޕޯޓަލް" އެވެ. އިލެކްޝަނުން ބުނީ އެ ޕޯޓަލް މެދުވެރިކޮށް ފޯމް ހުށަހެޅުން، ޖެނުއަރީ 30 ގެ ނިޔަލަށް ހުއްޓާލުމަށް ނިންމާފައިވާކަމަށެވެ. އެގޮތަށް ނިންމި ނަމަވެސް މައިޕޯޓަލް މެދުވެރިކޮށް ޕާޓީން ވަކިވުމުގެ ހިދުމަތް މެދުނުކެނޑި ކުރިއަށްދާނޭކަމަށް އިލެކްޝަނުން ބުނެއެވެ.
"ސިމަދަ ޕޯޓަލް"މެދުވެރިކޮށް ޕާޓީތަކަށް މީހުން ވެއްދުން ވަގުތީގޮތުން މެދުކަނޑާލަން ނިންމީ، ސިޔާސީ ޕާޓީތަކަށް މީހުން ވެއްދުމުގެ ނިޒާމް ހަރުދަނާކޮށް ޑިޖިޓަލް ނިޒާމަކަށް ބަދަލުކުރުމަށްކަމަށް އިލެކްޝަނުން ބުނެއެވެ. ޕާޓީތަކަށް މީހުން ވައްދާ ޕޯޓަލް މެދުކަނޑާލުމަށް އިލެކްޝަނުން ނިންމާފައި މިވަނީ، މީހުނަށް އޮޅޫވާލައިގެން ޕާޓީތަކަށް ވެއްދުމުގެ މައްސަލަތަކެއް ފެންމަތިވެފައި އެ މައްސަލަ ސީރިއަސްވެފައިވަނިކޮށެވެ.
އިލެކްޝަން ކޮމިޝަނުން މިހާރު މަސައްކަތްކުރަމުން އަންނަނީ އީފާސް މެދުވެރިކޮށް ހުށަހަޅައިގެން ޕާޓީތަކަށް ވަންނަގޮތް ހެދުމަށެވެ. އެގޮތުން އަންނަ މަހުގެ 15 ވަނަ ދުވަހުން ފެށިގެން ސިޔާސީ ޕާޓީއަށް ވަދެވޭނީ އީފާސް މެދުވެރިކޮސްކަމަށް އިލެކްޝަނުން ވަނީ ބުނެފައެވެ. މީހުނަށް އެނގުމެއްނެތި ޕާޓީތަކަށް ބަދަލުކުރަމުންދާ މައްސަލަތަކެއް އިލެކްޝަނަށް ހުށަހެޅިފައިވާއިރު، މިފަދަ ގިނަ އަދަދެއްގެ މައްސަލަތައް މިހާރުވެސް އެބައޮތްކަމަށް އެ ކޮމިޝަނުން ބުނެއެވެ.
Advertisement
This content is created and paid for by advertisers and does not involve Voice Journalists
