ހާއްސައެހީއަށް ބޭނުންވާ ދަރިވަރަށް އަނިޔާކުރިކަމަށް ތުހުމަތުކުރާ ޓީޗަރު ބަންދާމެދު ގޮތެއް ނިންމުމަށް ކޯޓަށް ހާޡިރުކުރުމުން ކޯޓުން އޭނާ ދޫކޮށްލައިފިއެވެ.

ޓީޗަރުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން އޭނާ ދޫކޮށްލާފައިވަނީ ޝަރުތުތަކާއެކުގައިކަމަށް ފުލުހުން ބުނެއެވެ. ކަލާފާން ސްކޫލްގެ ސެން ކްލާހުގައި ކިޔަވަމުންދާ އެ ކުއްޖާއަށް އަނިޔާކުރި މައްސަލަ ފެންމަތިވުމާއެކު ސްކޫލުން އެ ޓީޗަރުގެ މައްސަލަ ފުލުހަށް ހުށަހެޅީ މިދިޔަ ބްރާސްފަތިދުވަހުއެވެ.

ވޮއިސްއަށް މައުލޫމާތު ލިބިފައިވާ ގޮތުގައި ޓީޗަރު އަދިވެސް ހުރީ ސްކޫލަށް ނާދެވޭގޮތަށް ސަސްޕެންޑްކޮށްފައެވެ. 

Advertisement

ވޮއިސްއާ މައުލޫމާތު ހިއްސާކުރަމުން ހާއްސައެހީއަށް ބޭނުންވާ ކުއްޖާގެ އާއިލާގެ ފަރާތުން ވާހަކަދެއްކި މީހަކު ބުނީ، ކުއްޖާގެ ފަރާތުން ބުނެދޭ ވާހަކަތަކަށް ބަލާއިރު ޓީޗަރާމެދު ވަރަށް ސީރިއަސް ތުހުމަތުތަކެއް ކުރެވޭ ކަމަށެވެ. މިގޮތުން ކުއްޖާގެ އަނގަމަތީގައި ޓޭޕް އަޅައި އަތްބަނުމަށްފު ކުއްޖާއަށް އަނިޔާކުރާކަން ދޭހަވާކަމަށް އޭނާ ބުންޏެވެ. މި މައްސަލާގައި ބެލެނިވެރިޔާ ވަނީ ކްލާސްރޫމްތެރޭގެ ވީޑިއޯ ފޫޓޭޖްތައް ދެއްކުމަށް އެދިފައެވެ. ނަމަވެސް ސްކޫލުން އެކަންކޮށްދީފައި ނުވާކަން ބެލެނިވެރިޔާ ފާހަގަކުރިއެވެ.

މި މައްސަލާގައި ކަންބޮޑުވުން ފާޅުކުރައްވައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވަނީ މިއީ ބަލައިގަނެވޭނެ ކަމެއް ނޫންކަމަށް ވިދާޅުވެ، މިފަދަ ކަންކަން ތަކުރާރު ނުވާނޭގޮތަށް ފިޔަވަޅުތައް އެޅުމަށް ވިދާޅުވެފައެވެ. މިނިސްޓަރު ވަނީ ދަރިވަރުންގެ ހައްގުތައް ހިމާޔަތްކޮށް އުފާވެރި އަމާން މާހައުލެއްގައި ތައުލީމް ހާސިލްކުރުމަށް ޓީޗަރުން ހާއްސަ ސަމާލުކަމެއް ދިނުމަށް އެދިވަޑައިގަންނަވާފައެވެ.