ކަލާފާނު ސްކޫލްގެ ޕްރިންސިޕަލް މަޤާމުން ރިޓަޔަރކުރައްވައިފިއެވެ.
ކަލާފާން ސްކޫލް ހިންގެވުމާ ހަވާލުވެ ހުންނެވި ރަހްމާ ޢަބްދުއްރަހްމާން މަޤާމުން ރިޓަޔަރކުރިކަން ވޮއިސްއަށް ވަނީ އެ ސްކޫލުގެ ޓީޗަރަކު ކަށަވަރުކޮށްދެއްވާފައެވެ. ކަލާފާން ސްކޫލުގެ ޕްރިންސިޕަލް މަޤާމުން ރިޓަޔަރ ކުރައްވާފައިމިވަނީ، އެ ސްކޫލުގެ ޓީޗަރަކު، ހާއްސައެހީއަށް ބޭނުންވާ ދަރިވަރަކަށް އަނިޔާކުރި މައްސަލައެއް ތަހުގީގުކުރަމުން ދަނިކޮށެވެ.
ވޮއިސްއަށް މައުލޫމާތު ލިބިފައިވާ ގޮތުގައި އެ ސްކޫލުގެ ޕްރިންސިޕަލްގެ މަޤާމުގައި ހުންނެވި ރަހްމާ މި ހިނގާދިޔަ ހާދިސާގެ ކުރިންވެސް މަޤާމުން ރިޓަޔަރވުމަށް އައީ ތައްޔާރުވަމުންނެވެ. މިކަން ސްކޫލުގެ ޓީޗަރަކު ވޮއިސްއަށް ވަނީ ކަށަވަރުކޮށްދީފައެވެ. އެ ޓީޗަރު ވިދާޅުވީ ޕްރިންސިޕަލް ރިޓަޔަރކުރަނީ އެ މައްސަލަ ދިމާވެގެން ނޫންކަމަށާއި، ރިޓަޔަރކުރަން ކުރިންވެސް ނިންމާފައިވާކަމަށެވެ.
ކަލާފާން ސްކޫލުގެ ޕްރިންސިޕަލް މަގާމުން ރިޓަޔަރކުރެއްވިއިރު، އެޑިއުކޭޝަން މިނިސްޓްރީން މިއަދު ވަނީ، ކަލާފާން ސްކޫލަށް ޕްރިންސިޕަލަކު ހޯދުމަށް ގެޒެޓް ކޮށްފައެވެ.
ހާއްސައެހީއަށް ބޭނުންވާ ދަރިވަރަށް އަނިޔާކުރިކަމަށް ތުހުމަތުކުރާ ކަލާފާން ސްކޫލުގެ ޓީޗަރު މިހާރު ހުރީ ޝަރުތުތަކަކާއެކު ކޯޓުން ދޫކޮށްލާފައެވެ.
މި މައްސަލާގައި ކަންބޮޑުވުން ފާޅުކުރައްވައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވަނީ މިއީ ބަލައިގަނެވޭނެ ކަމެއް ނޫންކަމަށް ވިދާޅުވެ، މިފަދަ ކަންކަން ތަކުރާރު ނުވާނޭގޮތަށް ފިޔަވަޅުތައް އެޅުމަށް ވިދާޅުވެފައެވެ. މިނިސްޓަރު ވަނީ ދަރިވަރުންގެ ހައްގުތައް ހިމާޔަތްކޮށް އުފާވެރި އަމާން މާހައުލެއްގައި ތައުލީމް ހާސިލްކުރުމަށް ޓީޗަރުން ހާއްސަ ސަމާލުކަމެއް ދިނުމަށް އެދިވަޑައިގަންނަވާފައެވެ.
Advertisement
This content is created and paid for by advertisers and does not involve Voice Journalists
