ރާއްޖެ ފަދަ ގައުމުތަކަށް މޫސުމީ ބަދަލުތަކުގެ ސަބަބުން ކުރާ ނޭދެވޭ އަސަރު ބައްލަވައިލެއްވުމަށް ރާއްޖެ އަށް ވަޑައިގަތުމަށް އެމެރިކާގެ އައު ރައީސް ޑޮނަލްޑް ޓްރަމްޕަށް، ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލް އަދި ކުރީގެ ރައީސް މުހައްމަދު ނަޝީދު ދައުވަތު ދެއްވައިފި އެވެ.
ރައީސް ނަޝީދު ޓްރަމްޕަށް ދައުވަތުދީފައިވަނީ އެމެރިކާގެ ރައީސްކަމުގެ ހުވާ ޓްރަމްޕް ކުރެއްވުމާއިގުޅިގެން ސީވީއެފްގެ ސެކްރެޓަރީ ޖެނެރަލް ގެ ހައިސިއްޔަތުން ނެރުނު ސްޓޭޓްމެންޓެއްގައެވެ.
މިގޮތުން، ޓްރަމްޕްގެ ވެރިކަމަށް މަރުހަބާ ވިދާޅުވެ އެކުގައި މަސައްކަތްކުރަން ބޭނުންފުޅުވާކަން ފާހަގަކުރައްވާ ރައީސް ނަޝީދު ވިދާޅުވީ، މޫސުމީ ބަދަލުތަކާއި ގުޅޭގޮތުން އެންމެ ފުރަތަމަ ވެސް ޓްރަމްޕްގެ ސަރުކާރުން އެޅި ފިޔަވަޅަކީ ޕެރިސް އެގްރީމެންޓުން ވަކިވުންކަމަށްވާތީ އެކަމާއި ހިތާމަކުރައްވާކަމަށެވެ.
މި އެގްރީމެންޓަކީ ދުނިޔޭގެ ހޫނުމިން މަތިވުން ކޮންޓްރޯލް ކުރުމަށް ޖައްވަށް ދޫކުރާ ވިހަ ގޭސްތަކުގެ މިންވަރު މަދުކުރުމަށް 2015 ވަނައަރު ފްރާންސްގެ ވެރިރަށް، ޕެރިހުގައި ގައުމުތަކުން ވެފައިވާ އެއްބަސްވުމެކެވެ.
ރައީސް ނަޝީދު ވިދާޅުވީ، މި އެގްރީމެންޓުގައި ހިމެނޭ 70 މެމްބަރުންނަށް މި އެގްރީމެންޓަކީ ވަރަށް ލިބިދޭ އުންމީދެއްކަމަށާއި، މިއީ ބޮޑެތި ގައުމުތަކުން ތިމާވެއްޓަށް ދެމުން އަންނަ ގެއްލުންތައް ކުޑަކުރުމަށް އެކަށައަޅާފައިވާ އެގްރިމެންޓެއްކަމަށެވެ. އަދި ދިމާވާ މޫސުމީ ކާރިސާތަކުގައި ގައުމުތަކަށް އެންމެ އަސާސީ ހިދުމަތް ފޯރުކޮށްދިނުމުގެ ގާބިލުކަން ހުންނަން ޖެހޭނެކަމަށް ވެސް ވިދާޅުވިއެވެ.
މިއާއިއެކު، ރައީސް ނަޝީދު ވަނީ ގަނޑުފެން ވިރުމާއި، އިންތިހާއަށް ހޫނުވުމާއި، ކޮޅިގަނޑުތަކުގެ ސަބަބުން މޫސުމަށް ކުރާ ނޭދެވޭ އަސަރު ބެއްލެވުމަށް އެމަނިކުފާނު އަމިއްލަ ގައުމު، ރާއްޖެއަށް ޒިޔާރަތްކުރެއްވުމަށް އެމެރިކާގެ ރައީސް އަށް ދައުވަތުދެއްވާފައެވެ.
ރައީސް ނަޝީދުގެ ސްޓޭޓްމަންޓްގައި އެބޭފުޅާ ވަނީ އެންމެން ގުޅިގެން މޫސުމީ ބަދަލުތަކުން ކުރާ ނޭދެވޭ އަސަރުތަކުން ސަލާމަތްވުމަށް މަސައްކަތް ކުރަން ޖެހޭކަން ފާހަގަކުރައްވައި، އެމެރިކާއިން އަލުން ޕެރިސް އެގްރިމެންޓުގައި އަލުން ބައިވެރިވާނެ ކަމަށް އުންމީދުކުރައްވާ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
