ނޭޕާލުގެ އަސްކަރިއްޔާގެ ސިފައިން ބޭނުންކުރާ ޕްރައިމަރީ ހަތިޔާރެއްގެ ގޮތުގައި އޭކޭ-203 މަރުކާގެ ރައިފަލް ބޭނުންކުރުމަށް އިންޑިއާއިން ހުށަހަޅައިފިއެވެ.

އޭކޭ-203 އަކީ އިންޑިއާއާއި ރަޝިޔާ ގުޅިގެން ޑިޒައިންކޮށް، އިންޑިއާގައި އުފައްދާ ބަޑިއެކެވެ. މިހާރުވެސް ނޭޕާލުގެ އަސްކަރިއްޔާއިން ބޭނުންކުރަނީ އިންޑިއާއިން ސަޕްލައިކޮށްދޭ އިންސަސް މަރުކާގެ ބަޑިއެވެ. މި ވައްތަރުގެ ބަޑި އިންޑިއާގެ އަސްކަރިއްޔާއިންވެސް ބޭނުންކުރާއިރު، އިންޑިއާގެ އަސްކަރިއްޔާއިންވެސް މިހާރު ދަނީ އޭކޭ-203 އަށް ބަދަލުކުރަމުންނެވެ.

އޭކޭ-203 އަކީ މިހާރު ބޭނުންކުރާ ބަޑިތަކަށްވުރެ އިތުބާރު ހިފޭ، ވަރުގަދަ އަދި ގިނަ މާހައުލުތަކުގައި މައްސަލައެއް ނުޖެހި ބޭނުންކުރެވޭ ބަޑިއެކެވެ.

Advertisement

އިންޑިއާގައި އުފެއްދި އާ ބަޑިއެއް ނޭޕާލަށް ސަޕްލައިކުރުމަށް އިންޑިއާއިން ނިންމީ، އެގައުމުގެ އަމިއްލަ އުފެއްދުންތަކަށް އިތުރު މާކެޓް ހޯދައި، ސަރަހައްދީ ގައުމުތަކުން ޗައިނާގެ ހަތިޔާރުތަކަށް ބަރޯސާވިޔަ ނުދިނުމަށް ކުރާ މަސައްކަތުގެ ތެރެއިންނެވެ.