ރާއްޖެއިން މުމްބާއީއަށް ދިޔަ ފްލައިޓެއްގެ ފާހާނާއިން 3.7 މިލިއަން ރުފިޔާގެ ރަން ހޯދައިފިއެވެ. 

އިންޑިޔާގެ ކަސްޓަމްސްގެ އެއަރ އިންޓެލިޖެންސް ޔުނިޓުން (އޭއައިޔޫ) މި މައްސަލައާ ގުޅިގެން 24 އަހަރުގެ ފިރިހެނަކު ހައްޔަރުކޮށްފައިވެއެވެ. ކަރުނާޓަކާގެ އިނާމުލް ހަސަން ކަމަށް ބުނެވޭ މި މީހާ ވަނީ މަތިންދާބޯޓުގެ ފާހާނާގައި ރަން ފޮރުވާފައެވެ. އަދި މި ވިޔަފާރީގައި އެއަރޕޯޓުގެ މުވައްޒަފުންގެ ތެރެއިން ބަޔަކު ބައިވެރިވެފައިވާކަމަށް އޮފިޝަލުން ޝައްކުކުރެއެވެ.

އިންޑިޔާގެ ކަސްޓަމްސްގެ މަސްދަރުތަކުން ބުނާ ގޮތުގައި، މިކަމެއް ހިނގާފައިވަނީ މީގެ ތިން ހަފްތާކުރިންނެވެ.

އެގޮތުން ކަސްޓަމްސްގެ ލިބުނު އިންޓެލިޖެންސް މަޢުލޫމާތަކާ ގުޅިގެން މާލެއިން މުމްބާއީއަށް ދިޔަ ފްލައިޓެއް ބަލައި ފާސްކުރުމުން، ފާހާނާގެ ބައްތީގެ ޕެނަލްގައި ފޮރުވާފައިވާ 13 ޕައުޗް ރަން ފެނިފައިވެއެވެ. އަދި އޭގެ ތުހުމަތުގައި ހަސަން ވަނީ އެރައިވަލް ހޯލުން ހައްޔަރުކޮށްފައެވެ.

"ތަޙުޤީޤުގައި އޭނާ އެއްބަސްވެފައިވަނީ ރަން ފޮރުވީ މަތިންދާބޯޓުގެ ފާހާނާގައިކަމަށް،" ކަސްޓަމްސްގެ މަސްދަރަކުން ބުންޏެވެ.

އަދި މި މަސައްކަތުގައި ބައިވެރިވީ ފައިސާ ހޯދުމަށް ކަމަށް އޭނާ ބުނެފައިވާކަމަށްވެސް ބުނެފައިވެއެވެ.

މިހާރު ކަސްޓަމްސްއިން ދަނީ ހަސަން ރަން ހޯދި ގޮތާއި އެ ރަން ލިބެންވީ ފަރާތް ހޯދުމުގެ މަސައްކަތް ކުރަމުންނެވެ.

މިފަހުން، އިންޑިޔާގެ ޑައިރެކްޓަރޭޓް އޮފް ރެވެނިއު އިންޓެލިޖެންސްއިން ވަނީ މިފަދަ ވިޔަފާރިއެއްގައި ހަރަކާތްތެރިވާ ގްރޫޕެއް ހޯދާފައެވެ. މި ގްރޫޕުން ރަން އިންޑިޔާއަށް ގެންނަނީ ފަސިންޖަރުން މެދުވެރިކޮށެވެ. އަދި އިންޑިޔާއަށް އައުމަށްފަހު، މަތިންދާބޯޓުގެ ކުނި އުކާލާ ކާޓުގައި ރަން ފޮރުވުމަށްފަހު، އެހެން ފަރާތަކުން އެ ރަން ނަގައި، އަންހެނަކާ ހަވާލުކުރާކަމަށް މީޑިއާ ރިޕޯޓްތައް ބުނެއެވެ.